شارپرێس:
هێزێکی زۆری سوپای عێراق به‌چه‌كى قورسه‌وه گەیشتە گوندى ته‌په‌سه‌وزى سنورى قه‌زاى خورماتوو، سه‌رچاوه‌یه‌كیش ئامانجى جوڵه‌ى ئه‌و هێزه بۆ شارپرێس ئاشكراده‌كات، داواشده‌كات، به‌په‌له لایه‌نه كوردیه‌كان بێنه‌سه‌رخه‌ت‌و هه‌ڵوێست نیشانبده‌ن.
به‌گوێره‌ى ئه‌و زانیاریانه‌ى به‌شارپرێس دراون، به‌یانى ئه‌مڕۆ سوپاى عێراق به‌چه‌ك‌و هێزێكى زۆره‌وه به‌ئاراسته‌ى قه‌زاى خورماتوو جوڵه‌ى پێكراوه.
سه‌رچاوه‌یه‌ك زانیاریه‌كانى بۆ شارپرێس ئاشكراكردو ڕایگه‌یاند، "سوپای عێراق‌و ھێزی بەرپەرچدانەوەى خێراو پۆلیسی خورماتوو، بۆ یه‌كلاكردنه‌وه‌ى پرسى زه‌وى جوتیارانى كورد جوڵه‌یان كردوه".
سه‌رچاوه‌كه وتى:"جوڵه‌ى هێزه‌كه بۆ داگیركردنی زەویی جوتیارانی كورده‌و هه‌ر بۆ ئه‌و مه‌به‌سته چونەته‌سەر گوندی تەپەسەوزی سنوری خورماتوو و لەسەر داوای عەرەبی هاوردە، داوای چۆڵكردنی گوندەکەو داگیرکردنی زەویی‌و زاری گوندەکە دەكەن‌و بریاری دادگایان ھێناوە".
شارپرێس ئه‌وه‌شى زانیوه، یاسین محه‌مه‌د ئه‌ندامى ئه‌نجومه‌نى پارێزگاى سه‌ڵاحه‌دین له‌پشكى یه‌كێتیى ئێستا گه‌یشتوه‌ته گونده‌و هه‌وڵده‌دات هیچ نائارامییه‌ك له‌سنوره‌كه‌دا ڕونه‌دات‌و یاسا بڕیار له‌و كه‌یسه بدات.
ئه‌و سه‌رچاوه‌یه‌ى زانیارییه‌كانى به‌شارپرێس ڕاگه‌یاند ئاماژه‌ى به‌وه‌دا، "خه‌ڵكى گونده‌كه له به‌رامبه‌ر هێزه زۆره‌كه‌ى سوپاى عێراق وه‌ستاون‌و ڕێگه ناده‌ن بچنه گونده‌كه‌وه".