شارپرێس:
داهاتی نانەوتی هەرێم بۆ مانگی حوزەیران خرایەسەر هەژماری بانکی وەزارەتی دارایی فیدراڵ.
وه‌زاره‌تى دارایی‌و ئابورى حكومه‌تى هه‌رێم له‌ڕاگه‌یه‌نراوێكدا ئاشكرایكردوه، ئه‌مڕۆ پێنجشەممە داهاتی نانەوتی هەرێمی کوردستان بۆ مانگی حوزەیرانی ساڵی 2025 به‌شێوه‌ى كاش کە بڕەکەی 120 ملیار دینارە، بەشێوەی کاش خرایەسەر هەژماری بانکی وەزارەتی دارایی حکومەتی فیدراڵ لەلقی هەولێری بانکی ناوەندیی عێراق.
پێشتریش سەرچاوەیەک لەوەزارەتی دارایی ئاشكرایكردبوو، ڕێکارەکانی ناردنی 120 ملیار دینار داهاتی نانەوتی تەواوبون.
بەوتەی ئەو سەرچاوەیە، هەرێمی کوردستان هەموو پابەندییەکانی خۆی بەرامبەر بەغدا جێبەجێکردوە، ئێستا ماوەتەوە بەغدا، به‌گوێره‌ى ڕێککەوتن موچەی مانگی حوزەیرانی موچەخۆرانی هەرێم بنێرێت.
ڕۆژی 26ی ئه‌م مانگه کۆبوونەوەی ئەنجومەنی وەزیرانی عێراق بەڕێوەچوو، تێیدا بڕیاردرا، موچەی مانگی حوزەیرانی موچەخۆرانی هەرێم خەرجبکرێت، هەر لەکۆبونەوەکەدا بڕیاردراوە کارەکانی لیژنە پێکهێندراوەکان تایبەت بەچارەسەرکردنی پرسی هەناردەکردنەوەی نەوتی هەرێم‌و موچە بەردەوامبن.
لەماوەی چوار مانگی ڕابردوودا، فەرمانبەرانی هەرێم تەنها یەک موچەیان وەرگرتوە؛ دوایین جار 24ی تەمموز بوو کە موچەی مانگی ئایار نێردراو ڕۆژی دواتر دابەشکرا.
