شارپرێس:
حای ئیتان کۆهین یانورجاک، لێکۆڵەری ئیسرائیلی لە کاروباری تورکیادا، دووپاتیکردۆتەوە کە ئیسرائیل باکووری سووریا بە ناوچەیەکی سروشتی هەژموونی تورکیا دەزانێت، لە هەمان کاتدا ئاماژەی بەوەشکرد کە پەیوەندییە تایبەتەکانی تەلئەبیب لەگەڵ کوردەکانی عێراق چڕکراونەتەوە نەک کوردەکانی سووریا.

لێدوانەکانی یانورجاک لە کاتی بەشداریکردنی بوو لەبەرنامەیەکی کەناڵی I24 NEWSی عیبری, کە تێیدا ڕوونیکردەوە "ڕووبەڕووبوونەوە لە نێوان ئیسرائیل و تورکیا لە بەرژەوەندی هیچ یەکێک لە وڵاتان و ئەمریکا نییە، بەڵکو مەترسییەکی وێرانکەرە بۆ هەردووکیان".

وتیشی: "بۆ خۆدزینەوە لە ڕووبەڕووبوونەوەیەکی لەم شێوەیە، دەبێت دەسەڵات لە سووریا دابەش بکرێت، چونکە ئیسرائیل لەو وڵاتە ناکشێتەوە مەگەر بەپێی ڕێککەوتنێکی ڕوون.

لێکۆڵەرە ئیسرائیلییەکە ئاماژەی بەوەشکرد کە وڵاتەکەی، دوای ڕووداوەکانی حەوتی تشرینی یەکەم، "مەرج و واقیع سەپێنێت و قبوڵی ناکات بەپێی مەرجەکانی یاریزانەکانی تر بژیێت".

 جەختی لەوەشکردەوە کە پاراستنی ئیسرائیل پێویستی بەوەیە لە خاڵە سەرەکییەکانی سووریا و لوبنان بمێنێتەوە، و کشانەوە تەنها دوای واژۆکردنی ڕێککەوتننامەی ئاشتیی دەبێت کە دانپێدانانی دوولایەنە لەخۆ بگرێت.

سەبارەت بە هەڵوێست بەرانبەر ئەنقەرە، یانورجاک جەختیکردەوە کە ئیسرائیل "ڕێزی تورکیا دەگرێت، بەڵام حەز ناکات ڕۆڵێکی تورکی لە ناوەڕاست یان باشووری سووریا ببینێت"، لە هەمان کاتدا دووپاتیکرۆتدەوە کە "گەلی کورد لەلایەن ئیسرائیلەوە گرنگیی پێدەدرێت، بەڵام پەیوەندییە بەهێزەکەی تەنیا لەگەڵ کوردەکانی هەرێمی کوردستاندایە".

ئاکۆ عەبدوڵڵا ئاڵی