شارپرێس:
لەسەر بنەمای ڕاپۆرتە ڕۆژنامەوانییەکان، ئیسرائیل لە تشرینی یەکەمی 2023ەوە ناتوانێت ڕێگری لە هێرشەکانی حووسییەکان بکات، کە بە مووشەکی بالیستی و فڕۆکەی بێفڕۆکەوان دەکرێنە سەر ئەو وڵاتە، سەرەڕای نزیکبوونەوە لە تێپەڕبوونی دوو ساڵ بەسەر دەستپێکی ئەم هێرشانە.
بەپێی وتەی بەرپرسانی سەربازی کە بۆ ڕۆژنامەی ئۆرشەلیم پۆست قسەیان کردووە، تەلئەبیب سیاسەتی خۆدزینەوە لە ڕووبەڕووبوونەوەی ڕاستەوخۆ لەگەڵ حووسییەکان گرتووەتەبەر، و واشنتۆنی بەجێهێشتووە بۆ مامەڵەکردن لەگەڵیان، چونکە پێیان وایە چوونە نێو شەڕێکی تۆڵەسەندنەوە "سوودی نابێت".
ئەم بەرپرسانە حووسییەکان بە مەترسیدارترین بریکارەکانی ئێران وەسف دەکەن، چونکە بە ئاسانی ناتوانرێن بوەستێنرێن بەهۆی سروشتی سەختی خاکی یەمەن و شێوازی شەڕی پارتیزانییان.
ئاماژە بەوە دەکەن کە ئەم گرووپە ڕاهاتوون لە ئەشکەوتەکاندا بژین و پشت بە کەناڵی چەکدارکردنی ناڕاستەوخۆ ببەستن، ئەمەش وا دەکات هەوڵەکانی بڕینی کۆمەک یان بە ئامانجگرتنی سەرچاوەکانی دابینکردنی پارە کاریگەرییەکی ئەوتۆی نەبێت.
بۆ نموونە، دوایین هێرشی ئیسرائیل بۆ سەر سەنعا لە دووشەممەی ڕابردوو، کە سەرکردە سەربازییەکان وەک کارێک پڕوپاگەندەیان بۆ دەکرد کە حووسییەکان بۆ ماوەیەکی درێژ بێ کارەبا دەکات، بەڵام گرووپەکە بە خێرایی کارەبایان گەڕاندەوە و مووشەکێکی نوێیان ئاراستەی ئیسرائیل کرد، ئەمەش سنوورداری کاریگەری ئەم لێدانانەی دەرخست.
خەمڵاندنەکانی شارەزایانی سەربازی ئاماژە بەوە دەکەن کە حووسییەکان لە ماوەی مانگەکانی ڕابردوودا زیاتر لە 500 هێرشیان کردووەتە سەر ئیسرائیل، لە کاتێکدا تەلئەبیب بەردەوام بووە لە بۆمبارانکردنی ئامانجە دووبارەکان لە حودەیدە و سەنعا بەبێ بەدەستهێنانی ئەنجامی یەکلاکەرەوە، ئەمەش پرسیار دەورووژێنێت سەبارەت بە هۆکاری خۆدزینەوەی ئیسرائیل لە ئەنجامدانی ئۆپەراسیۆنی جۆریی دژ بە سەرکردەکانی گرووپەکە، وەک ئەوەی لە ئێران و لوبنان و غەزە کردی.
ڕۆژنامەی واشنتۆن پۆست لەسەر زاری سەرچاوە بەرگرییەکانی ئیسرائیلەوە بڵاوی کردۆتەوە کە "یەمەن ئاستەنگێکی زۆر گەورەترە"، چونکە حووسییەکان بە پێکهاتەیەکی نا ناوەندیی کار دەکەن کە بەئامانجگرتنی سەرکردایەتییەکی دیاریکراو قورس دەکات.
هەروەک، هەوڵەکانی دەزگای هەواڵگری ئیسرائیل بۆ تێپەڕاندنی گرووپەکە پاشەکشەی کرد دوای سەرکەوتنی دۆناڵد ترەمپ لە هەڵبژاردنەکانی ئەمریکای تشرینی دووەمی ڕابردوودا، چونکە ترەمپ لە سەرەتای ساڵی 2025 دا، دوای وەرگرتنی پۆستەکەی، فەرمانی بە زیادکردنی هێرشەکان دژ بە حووسییەکان کرد، پاشان ڕێککەوتنێکی لاوەکی لەگەڵیاندا واژۆ کرد کە ئیسرائیلی بە شێوەیەکی ڕێژەیی لە گۆشەگیریدا هێشتەوە.
سەرچاوەکان دەشڵێن هەوڵەکانی دزەکردنی هەواڵگری بە شێوەیەکی کاریگەر دەستی پێنەکردووە تەنها کەمتر لە ساڵێک پێش ئێستا، ئەمەش وای کردووە لە سەرەتادا بن، لە کاتێکدا ئەم ئۆپەراسیۆنانە بە شێوەیەکی گشتی پێویستیان بە ساڵانێک کاری بەردەوام هەیە.
سەرەڕای ئەوەش، بازنەکانی بەرگری دووپاتی دەکەنەوە کە پێشکەوتن دەستی پێکردووە و لەوەی سەرکردەکانی ئیسرائیل دەیانەوێت کاتی زیاتری دەوێت، بەڵام کەمترە لەوەی زۆرێک لە شارەزایان خەمڵاندنی بۆ دەکەن.


ئاکۆ عەبدوڵڵا ئاڵی