وا هەفتەیەک تێئەپەڕێت بەسەر ئەوەی لە بەرەبەیانی 22/ 8/ 2025 رویدا، کە بە هەمو پێوەرێک شۆکێکی سیاسیی گەورە بو بۆ خەڵکی کوردستان بەگشتی و شاری سلێمانی بەتایبەتی. لە راستیدا ئەوەی لەو رۆژە رویدا بۆ زۆرێک لە ئێمە پێشبینی نەکراو نەبو، بەڵکو هەمیشە ئەمانزانی کە بونی هێزی چەکداری حیزبی و شەخسی، بەردەوام ئەگەری پێکدادان و بە خوێناویکردنی ململانێ سیاسییەکان بە کراوەیی ئەهێڵێتەوە. بەڵام ئەوەی بۆ هەموان شۆکێکی گەورە بو، بەکارهێنانی ئەو هەمو هێز و چەک و تەقەمەنییە بو لەناو جەرگەی شاری سلێمانی بەو شێوە نارێکخراو و هەڕەمەکییە!
هەڵبەت ئەوەی روی دا و بەکارهێنانی ئاگر بەو فراوانییە، دەربڕی بونی ترسێکی گەورەیە لە نەیارە سیاسییە چەکدارەکان. بەکارهێنانی هێزی چەکدار بۆ یەکلاکردنەوەی هەر ململانێیەکی سیاسیی تەنانەت لەناوخۆی یەک حیزب، هەمیشە ئەگەری پەنابردنەوەی نەیارە سیاسییەکان بۆ چەک ئەکاتە مەترسییەکی گەورە بۆ سەرانی ئەو حیزبە. هەر لە وێنە کۆن و تازەکان بڕوانن بۆتان دەرئەکەوێ کە چۆن وەلائی چەکدارەکان لەمەوە بۆ ئەو چەند بە ئاسانی ئەگۆڕێن!
چەند جارێک کاک نەوشیروان باس و خواستی ململانێکانی ناو یەکێتیی بۆ باس ئەکردین، بەتایبەت بابەتی کۆکردنەوەی ئیمزاکان و دروست بونی باڵی ریفۆرم (درێژەی ئەم بابەتە و هەڵوێستی دواتری کاک نەوشیروان لەسەر ئەو پڕۆسەیە بۆ کاتێکی تر هەڵدەگرین). باسی لەوە ئەکرد کە لە یەکێک لە دانیشتنەکانیان «فڵان» وتی کاک نەوشیروان ئێستا ئەمر بکە ئەچم «فڵان سەرکردە» ئەهێنم بۆ ئێرە، کاک نەوشیروان ئەیوت پێم وت ئەگەر بتەوێ بچیتە سەر ئەو سەرکردەیە من ئەچمە سەربانی بارەگاکەی و بەرگریی لێئەکەم، ئەیوت نەمویست بابەتی پەنا بردن بۆ هێز لە ململانێ ناوخۆییەکانی یەک حیزب ببێتە نەریت! بەداخەوە ئەمانە کردیانە نەریت و وا چەند جارێک و لە حیزبی جیاوازدا دوبارە ئەبێتەوە.
هەر بۆیەش لەوەی رویدا دەرئەکەوێ ئەوەی مەترسیی راستەقینەیە لەسەر دەسەڵاتدارانی هەرێم و سەرانی ناو هەر دو حیزبی حوکمڕان، دروست ئەوەیە کە بە خاڵی هێزی خۆیانی ئەزانن، هێزە چەکدارەکانیان! ئەمانە ئەگەر هێزی چەکداری حیزبی و شەخسییان نەبێ ئەو مەترسییە گەورەیەیان لەسەر نییە، ئەگەر ناکۆکیش لە نێوانیان بێتە کایەوە مەترسیی سڕینەوە و لەناوچونیان لەسەر نییە. کاکە ئێوە ئەگەر چەکتان بە دەستەوە نەبێت نە کەس ئەکوژن و نە کەس ئەتانکوژێ، نە کوڕی خەڵکیش بە کوشت ئەدەن!
لەم روداوانەدا هەمو هەرێمی کوردستان زیانمەند بو، دیبلۆماتێک پێی وتم کە «پێشتر لای حیزبە عێراقییەکان، هێزە چەکدارەکانی هەرێممان بەنمونە ئەهێنایەوە کە سەرباری وەلائی حیزبییان بەڵام رادەیەکی زۆر لە (إنضباط)یان تێدایە، ئێستا توشی شۆک بوین لەوەی روی دا!». لەم روەوە پرسی هاوکارییەکانی هێزی پێشمەرگە و تەنانەت هاوکاریی سیاسی و دیبلۆماسیی هەرێمی کوردستان لەمەحەکن. بە هەمان شێوە شاری سلێمانی زیانێکی گەورەی بەرکەوت، ناوبانگی سلێمانی هەمیشە ئارامی و کراوەیی و یەکترقەبوڵکردن و رێزگرتنی فرەیی بوە! ئەم وێنەیە لە روداوەکانی (لالەزار) زیانێکی گەورەی بەرکەوت، سەرکردەیەکی تشرینییەکان پێی وتم «جاران بۆ زۆربەی کارەکانمان سلێمانیمان هەڵدەبژارد بەڵام ئیتر ئەو وێنەیەی سلێمانی لای ئێمە کەوت!».
یەکێتی خۆی زیانمەندێکی گەورەی ئەو روداوانەیە، شەرعییەتی جیابونەوەی «جەلالی» لە «مەلایی» و دواتریش دروست کردنی یەکێتی، جیاوازیی شێوازی سیاسەت کردن و حیزبایەتی بوە، یەکێتی تادێت هیچ جیاوازییەکی لەگەڵ پارتی نامێنێت لەو هەمو شتانەی وەک رەخنە و توانج پارتییان پێ تۆمەتبار ئەکرد!
لە دوای ئەوەی رویدا ئیتر پێویستیی گۆڕینی ئەو شێوازی حوکمڕانییەی هەرێم  بوەتە پێویستییەکی حەتمی بۆ مانەوەی هەرێم، وەگەرنا ئێستا سەردەمی نەوەدەکانی سەدەی رابردو نییە، ئەگەری شەڕی ناوخۆی پارتی و یەکێتی هەرێم ئەڕوخێنێت و کەسیش بەهانایەوە نایەت!
چیدی ناکرێت وەک ئەوەی هیچ روی نەدابێ تەماهی لەگەڵ رژێمی حوکمڕانیی ئێستای هەرێم بکەین! یەعنی ئێستا ئیتر هەڵبژاردن و دەنگدان و پەرلەمان و ئەم شتانە ئیتر چ نرخێکیان هەیە کە ململانێکان بە چەک یەکلا بکرێنەوە!
ئایا ئیتر کاتی دابڕان نییە لەگەڵ ئەم شێوازی حوکمڕانییەی هەرێم!؟