شارپرێس:
دوای هێرشە موشەکییەکەی سەر کێڵگەی کۆرمۆر، هەوڵەکان چڕکراونەتەوە بۆ گەڕانەوەی کارەبای نیشتمانی بۆ باری ئاسایی خۆی، موه‌لیدە ئەهلییەکانی گەڕەکیش سەرپشککراون لەهەڵکردنی مۆلیدەکانیان، سه‌رچاوه‌یه‌كیش له‌پڕۆژه‌ى ڕوناكى ڕایگه‌یاندوه، "کارەبای نیشتیمانی لەماوەی 24 کاتژمێری داهاتودا دەگەڕێتەوە دۆخى ئاسایی"، به‌ڵام وه‌زاره‌تى كاره‌با ده‌ڵێت، لە 48 کاتژمێری داهاتودا پێدانی کارەبا ئاسایی دەبێتەوە.
ئه‌م دوو زانیارییه‌ى له‌سه‌ره‌وه ئاماژه‌یان پێكراوه دوو ڕاگه‌یه‌نراوى جیاوازى پڕۆژه‌ى ڕوناكى‌و وه‌زاره‌تى كاره‌باى حكومه‌تى هه‌رێمن كه هه‌ردوكیان شه‌وى ڕابردوو بڵاویانكردوه‌ته‌وه.
سەرچاوەیەک لەپڕۆژەی ڕوناکی به‌میدیاى نزیك له‌پارتى وتوه، "کارەبای نیشتیمانی لەماوەی 24 کاتژمێری داهاتودا دەگەڕێتەوەو ڕێگریی لەهیچ خاوەن موه‌لیدەیەکیش نەکراوە بۆ هەڵکردنی موه‌لیدەکانیان".
ئه‌و سەرچاوەیە ئاماژه‌ى به‌وه‌شكردوه، "لەهیچ شارو شارۆچکەیەک ڕێگریی لەخاوەن موه‌لیدەکانی گەڕەک نەکراوە موه‌لیدەکانیان کارپێبکەن، پڕۆژەی ڕوناکی ڕێگر نابێت لەهەڵکردنیان".
ئەردەلان دۆسکی، بەڕێوەبەری گشتیی دیوانی وەزارەتی کارەبای حکومەتی هەرێم باسى له‌وه‌كردوه، "هاوڵاتیان دڵنیا دەکەینەوە بەخێرایی کێشەکە چارەسەردەکرێت، وێستگەکەش چاککراوەتەوەو لەماوەیەکی نزیک کارەبا دەگەڕێتەوە باری ئاسایی خۆی".
دۆسکی باسى له‌وه‌شكردوه، "هاوڵاتیان دڵنیادەکەینەوە بەخێرایی کێشەکە چارەسەر دەکرێت، لە 48 کاتژمێری داهاتودا لەهەرێم پێدانی کارەبا ئاسایی دەبێتەوە، چونکە وێستگەی کۆرمۆر چاککراوەتەوە، کۆمپانیای بەرهەمهێنەر داوادەکات دڵنیایی پێبدرێت بۆ ئەوەی ئەم ڕوداوانە دوبارە نەبنەوە".
ئه‌وه‌شى وتوه، "ژمارەیەک لەوێستگە ناوخۆییەکان وەگەڕخراون بۆ دابینکردنی کارەبا، هەزارو 500 میگاوات کارەبا لەبەردەستەو بەشێوەیەکی دادپەروەرانە بەسەر شارەکانی هەرێمی کوردستان دابەشدەکرێت".
شەوی 26ی ئه‌م مانگه، بەموشەک هێرشکرایەسەر کێڵگەی غازی کۆرمۆر لەچەمچەماڵ، بەهۆیەوە 525 ملیۆن پێ سێجا غازی ڕۆژانە وەستاو بەرهەمهێنانی سێ هەزار مێگاوات کارەبا ڕاگیرا، ئەمەش وایکرد بەرهەمهێنانی کارەبای نیشتمانی داببەزێت‌و پێدانی کاتژمێرەکانی کارەبا لەڕۆژێکدا بۆ پێنج کاتژمێر کەمببێتەوە.
