شارپرێس:
سوپاى پاسداران له‌باره‌ى هێرشى موشه‌كى بۆ سه‌ر هه‌رێم ڕونكردنه‌وه بڵاوده‌كاته‌وه‌و ڕایده‌گه‌یه‌نێت، "هیچ موشه‌كێكى نوێمان ئاراسته‌ى هیچ بنكه‌یه‌ك له‌هه‌رێمى كوردستان نه‌كردوه".
كه‌مێك له‌مه‌وبه‌ر ژماره‌یه‌ك په‌یج‌و ئه‌كاونتى ئێران كه گرنگى به‌بڵاوكردنه‌وه‌ى هه‌واڵه‌كانى سوپاى پاسداران ده‌ده‌ن له‌تێلیگرام، چه‌ند گرته‌یه‌كى ڤیدیۆیى بڵاوكرده‌وه‌و ڕایگه‌یاند، پاسداران هێرشى موشه‌كى كردوه‌ته‌سه‌ر چه‌ند پێگه‌یه‌كى مۆسادى ئیسرائیل.
بڵاوكردنه‌وه‌ى ئه‌و هه‌واڵه زۆرى به‌سه‌ردا تێنه‌په‌ڕى، سوپاى پاسداران به‌فه‌رمى هاتوه‌ته ده‌نگ‌و ڕایده‌گه‌یه‌نێت، "هیچ موشه‌كێكى نوێمان ئاراسته‌ى هه‌رێمى كوردستان نه‌كردوه".
ئه‌گه‌رچى له‌و ڕونكردنه‌وه‌یه‌دا ئامانجى بڵاوكردنه‌وه‌ى ڤیدیۆو زانیارییه‌كانى پێشویان ڕوننه‌كردوه‌ته‌وه، به‌ڵام وه‌ك هه‌ڕه‌شه‌یه‌ك ده‌ڵێت، "ئه‌گه‌رچى تائێستا هیچ هێرشێکی موشەکی نوێی سوپای پاسداران بۆسەر هەرێمی کوردستان نەکراوە، به‌ڵام هه‌رێمى كوردستان لەمەودای تۆپخانەکانی سوپای پاسداراندایەو توانای لێدانی ئامانجه‌كانمان هەیە لەوێ".
له‌و ڕونكردنه‌وه‌یه‌دا ده‌ڵێت، "موشەکی گرانبەها بۆ ئەم مەودا کورتە بەکارناهێنین".
ئێمه له‌ده‌زگاى میدیاى شارپرێس، سه‌ربارى داواى لێبوردن بۆ بڵاوكردنه‌وه‌ى هه‌واڵه‌كه‌ى پێشومان، جه‌ختده‌كه‌ینه‌وه، پیشه‌ییانه مامه‌ڵه له‌گه‌ڵ ڕوداوه‌كان ده‌كه‌ین‌و هیچكات ئامانجمان بڵاوكردنه‌وه‌ى ترس‌و بیم نییه له‌ناو هاوڵاتیانى هه‌رێمى كوردستان خوێنه‌رانمان، هێنده‌ى مه‌به‌ستمانه زوو له‌سه‌رچاوه فه‌رمیه‌كانه‌وه زانیارییه‌كان بڵاوبكه‌ینه‌وه.
