شارپرێس:
سەرۆكی حكومەتی هەرێمی كوردستان لەپەیامێكدا سوپاسی خەڵكی كورستان دەكات و دەڵێت، سوپاسی خەڵکی کوردستان دەکەم بۆ پشودرێژی و خۆڕاگرییان و ئەوەش ئاشكرادەكات، كە لەگەڵ کۆمپانیای دانا گاز گەیشتونە ڕێککەوتن بۆ دوبارە دەستپێکردنەوەی بەرهەمهێنان و گەڕاندنەوەی کارەبا لەچەند کاتژمێری داهاتودا.
مەسرور بارزانی، سەرۆكی حكومەتی هەرێمی كوردستان، لەپەیامێكدا ڕایگەیاند، سوپاسی خەڵکی کوردستان دەکەم بۆ پشودرێژی و خۆڕاگرییان کە لەدوای هێرشە تیرۆریستییەکەی چەند ڕۆژی ڕابردوو بۆ سەر ژێرخانی گازی هەرێمی کوردستان، توشی کەمیی کارەبا بونەوە".
ئاشكراشیدەكات، ئەمڕۆ لەدوای ئامادەکارییە تەکنیکییەکان، لەگەڵ کۆمپانیای دانا گاز گەیشتینە ڕێککەوتن بۆ دوبارە دەستپێکردنەوەی بەرهەمهێنان و گەڕاندنەوەی کارەبا لەچەند کاتژمێری داهاتوداو دەڵێت، لەگەڵ بەڕێوەبەرایەتی کۆمپانیاکە قسەم کردو سوپاسی بەڕێوەبەرایەتی و گشت کارمەندەکانم کرد بۆ خۆڕاگری و ئیرادەی بەهێزیان".
مەسرور بارزانی ئاماژەی بۆ ئەوەشكرد، ئەمە یازدەمین هێرشە بۆ سەر کێڵگەکە.
جەختیش دەكاتەوە، ئەم هێرشە نابێت بەبێ لێپرسینەوە تێپەڕێت و نابێت هێرشەکان ببنە ڕوداوی ئاسایی و دەشڵێت، لەگەڵ سەرۆک وەزیرانی فیدراڵ بەڕێز محەممەد شیاع سودانی باسمان کردوە کە دەبێت ئەنجامدەرانی ئەم هێرشە هەر لایەن و گروپێک بن و لە هەر کوێ بن لێپرسینەوەیان لەگەڵدا بکرێت و ڕادەستی یاسا بکرێن".