شارپرێس:
بریکاری وەزارەتی نەوتی عێراق ڕایگەیاند، لەسەر راسپاردەی سەرۆک وەزیرانی عێراف غازی ماڵان گەیەندراوەتە هەرێمی كوردستان و دەڵێت، غازی پێویست بەردەستەو گرفتی غازی ماڵان دروست نابێت.
د. عیزەت سابیر، بریکاری وەزارەتی نەوتی عێراق، ئەمشەو لەڕاگەیەندراوێكدا بڵاویكردەوە، لەسەر ڕاسپاردەی محەمەد شیاع سودانی سەرۆک وەزیرانی عبَراق، وەزارەتی نەوت غازی شلی ماڵان (LPG) گەیاندە تەواوی پارێزگاکانی هەرێمی كوردستان.
د. عیزەت سابیر جەختی لەوەكردەوە كە غازی پێویستیان لەبەر دەستدایە بۆ پڕکردنەوەی پێداویستییەکان، دڵنیایی دەدەنە هاوڵاتیان كە لەو ڕوەوە هیچ گرفتێك ڕونادات.
ئەمە لەكاتێكدایە، وەزارەتی سامانە سروشتیەكانی هەرێمی كوردستان ئەمشەو ڕایگەیاند، دوای هێرشەكەی سەر كێڵگەی كۆرمۆر، داوای 760 تەن غازیان لەوەزارەتی نەوتی عێراقی فیدراڵ كردوەو ئەمڕۆش بەشی یەكەمی گەیشتە هەرێمی كوردستان و ڕاستەوخۆ بەسەر كارگەكانی غازدا دابەشدەكرێت.