شارپرێس:

دوای هەڵبژاردنی ئەندامانی دەستەی سەرۆکایەتی پەرلەمانی عێراق، ئەندامێکی فراکسیۆنی بونیادنان و گەشەپێدان ناوی دوو کاندیدی سەرەکی بۆ وەرگرتنی پۆستی سەرۆک وەزیرانی داهاتوی عێراق ئاشکرادەکات.

بەها ئەعرەجی، ئەندامی فراکسیۆنی بونیادنان و گەشەپێدان بە ئاژانسی هەواڵی "واع"ی راگەیاندوە،" تەنها دوو کەس بەجددی وەک کاندیدی سەرەکی بۆ پۆستی سەرۆک وەزیرانی داهاتوو ناویان هاتوە، ئەوانیش بریتین لە محەمەد شیاع سودانی سەرۆک وەزیران و نوری مالکی سەرۆکی هاوپەیمانی دەوڵەتی یاسا ".

ئەوەشیخستەڕوو، دوای دیاریکردنی دەستەی سەرۆکایەتی پەرلەمان، پێویستە لەمەودوا کۆبونەوەی جددی و بەرهەمدار ئەنجامبدرێت.

ئەمرۆ سێشەممە، پرۆسەی هەڵبژاردنی سەرۆک و جێگرانی سەرۆکی پەرلەمانی عێراق کۆتاییهات و دەرگای کاندیدبون بۆ پۆستی سەرۆک کۆمار کرایەوە، بەپێی دەستوریش پێویستە لەماوەی 30 رۆژدا سەرۆک کۆماری نوێی وڵات هەڵبژێردرێت، دواتریش سەرۆک کۆمار کەسێک بۆ پێکهێنانی حکومەتی نوێ رادەسپێرێت و دەبێت کەسی راسپێردراو لە ماوەی 45 رۆژدا تەواوی کابینە حکومییەکەی رابگەیەنێت.