« بەڵتەجی » لە ئەسڵدا چەمکێکی تورکیە کە دوو پێکهاتەی وشەیە « بەڵتە » واتە داس یان چەپەچاخ و « چی » واتە ئەوەی چەپەچاخەکە هەڵدەگرێت لەخۆدەگرێت ، بە کەسێک دەوترێت بەڵتەچی کە بێ هیچ و خۆڕایی پەلاماری ئەوەی تر بدات ، بەڵام ئایا هیچ پەیوەندیەک هەیە لەنێوان بەڵتەجی و چەمکی سەروەری « سیادة » ، لە حالەتی بەڵتەجیدا قانون و دەسەڵاتی ڕەسمی غائیبە و کەشوهەوای کۆمەڵایەتی سازکراوە بۆ بەدیارکەوتنی کەسان و گڕوپ و دەوڵەت و ملیشیای بەهێزی چەکدار کە هێزەکانیان بۆ ترس و تۆقاندن و پەلاماردانی ئەوانی تر بەکاردەهێنن بۆ وەرگرتنی خاوە ، یان کە بەرژەوەندی ئاغەکەیان دەکەوێتە بەر مەترسی بەڕێنمایی ئاغاکە پەلامار دەدات ، ئەمە ڕێک لەسەر ملیشیا چەکدارەکانی عێراق دەچەسپێت ، کە ناوە ناوە پەلاماری ژێرخانی ئابووری هەرێمی کوردستان دەدەن و ، دەسەڵاتدارانی عێراق قڕوقپ بەرانبەریان وەستاوە و ، ئەو ئیدانە و ناڕەزاییەش کە لە زاری سەرانی دەسەڵاتداری شیعە دەبیستین تەنها لە چوارچێوەی بەیاننامەیە و هیچی تر نین !! دیارە هەروەکچۆن نازیەت و هیتلەر دووچاری گەورەترین پڕۆسەی بە شەیتانیکردنی سیستەماتیک لە ميژوو بوونەوە ، ئێستاش دەسەڵاتدارانی شیعەی عێراق و پێشووش سوننە بەتایبەتی لە ڕیفراندۆمدا بەشەیتانکراین ، هەردوولایەنیان مێژووێکی پڕ لە شەرمەزاریان بەرانبەر کورد هەیە ، جارێک بە جینۆساید ، ئەمجارەش کە هەتا دوێنێ لەگەڵ شیعە هەردوولا قوربانی بووین ئێستاش بۆتە جەلاد لە بڕینی قوتی خەڵکی و هەڵتەکاندنی ژێرخانی ئابووری و لووتبەرزی باڵادەستی ، ئەمە لاوازی کوردە کە وایلێهاتووە دەستەوەستان ڕاوەستێت ، کە بەڕاستی کورد تووشی ئایدزی سیاسی بووە و مناعەی سیاسی لەدەستداوە ، هەروەها لاوازی یەکگرتوویی کۆمەڵایەتی و سیاسییە ، کە وایکردووە بێوەری پەیوەندی نیشتیمانیی لەسەر حسابی پەیوەندی حزبی و بەرژەوەندی کەسی ونبێت ، نکۆڵی لەوە ناکرێت کە دەبینین هزری غەرائیزی لە عێراق بە ڕوونی دیار و ئامادەیە ، ئەوانەی لە دەسەڵاتن بە ملیشیا چەکدارەکانیشیانەوە ، هێشتا لە تۆڵەسەندنەوەی نەیارەکانیان چاکنەبوینەوە و ، پێیان وایە کە باپیرەی باپیرەیان لە چواردە سەدەوە نەیاری ئەوانەن کە ئێستا پێکەوەن ، عێراق حالەتێکی نموونەییە بۆ بیری غەرائیزی و سیاسەتی غەرائیزی و ، بەناو دەوڵەتەکەشیان لەسەر بنچینە و بنەمای غەرائیزی بونیاتناوە و پلانیشیان بۆ ئایندە بە ڕێبازێکی غەرائیزیە و بناخەی کۆمەڵگایەکی تائیفی کە بۆ سەدەکانی ناوەاراست دەگەڕێتەوە دانا ، ئەمە هەناردەکردنی حالەتی غەرائیزیە بۆ نەوەکانی دادێ ، لەسەر ئەو بنچینەیە مامڵە لەگەڵ کورد و غەیرە کورد دەکەن ، جا وەرە لەگەڵ کەسانێک مەمڵە بکەیت کە غەریزە ئاژەڵیەکانی کۆنتڕۆلی هەموو ڕەفتارەکانی بکات و ، کۆنتڕۆلی ئیدارە و دەسەڵات و حزب و گڕوپ و رێخراوەکانی بکات ! ئەو عەقلیەتی غەرائیزیە تەنها لە میانی حەز و شەهواتەکانی واقیع دەبینێت ، لەمیانی لەگەڵ منی یان دەژمنمی ، ڕازیم دەکەیت یان تووڕەم دەکەیت ، خۆشمت دەوێت یان رقت لێم دەبێتەوە ، بەداخەوە ئەگەر لە مێژووی ئینسانیەتدا سەیری بەڕبەڕیەت بکەین کە چ تووندوتیژیەکی لە ڕادەبەدەر بەدرێژایی مێژوو ئەنجامداوە و ، ئێستاش لەناو دڵی شارستانیەتی نوێ وێنەی بەڕبەڕیەت دەبینرێت و ، ئەو بیرۆکانەی کە مرۆڤایەتی ئازار داوە ، بریتین لە سۆز و پاڵنەرە شەڕانگێزەکان ، لەوانە مەیلی سادیانە لە چێژوەرگرتن لە ئازاردانی کەسانی تر و ، سۆزی وێرانکەر و هەستی بەخیلیبردن کەوا لە وڵاتان و گڕوپەکان دەکات بڕوا بەوە بهێنن کە پێشکەوتن و گەشەسەندن لەسەر حسابی ئەوان بووە ، کە ئێستا کەسانی شیعەی عێراق بازاری بۆ دەکەن و پاساو بۆ دواکەوتنی عێراق لەو پێشکەوتنە دێننەوە ، دیسان بەداخەوە لەنێو ئەو دۆخە پڕ کيشمەکێش و نالەبارەدا ، کورد بە دۆخێکی ناتەبا و پارچەپارچە و فەوزا و نەبوونی هەماهەنگی و بێتوانایی لەسەر لێکتێگەیشتن و حیوار دەچێتە بەغدا ، کورد بەو عەقلیەتە ناتوانێت بچێتە ژوورەوە بۆ ئاییندە ، ئەو عەقلیەتە هەروەکو سەدەکانی پێشوو لە دەرەوەی ميژوو دەیهێڵێتەوە ، چونکە ئەو کەسەی بەهاکانی عەقل و زیرەکی و زانینی بەرژەوەندیەکانی بەشێوەیەکی ووردبین و واقیعی نەبینێت ناتوانێت لەناو ئەو سەردەمەدا بژیت و ناشتوانێت بەروەڕووی ناخۆشی و ڕووداوە نەخوازراوەکان وەکو ئەوەی ئێستا کە دووچارمان بووە ببێتەوە ، داهاتوو جێگەی ئەوانەی لێنابێتەوە کە جیهان بە پێوەری خۆیان یان بە پێوەری گڕوپ و حزبەکەیان دروستدەکەن ، ئەمەی ئەوان تەنها لە هۆنراوەکانی شیعر یان ڕۆمان- دا هەیە .
ئەم وتارە دەربڕی بۆچونی نووسەر خۆیەتی