شارپرێس:

سەرەڕای هێرشە ئاسمانییەکانی ئەمریکا و ئیسرائیل بۆ سەر ئێران، راپۆرتێکی هەواڵگری ئیسرائیل رایدەگەیەنێت کە گورزەکان بۆ تێکشکاندنی توانای مووشەکیی ئێران یەکلاکەرەوە نەبوون.

راپۆرتەکە دەڵێت: لەکاتێکدا دۆناڵد ترامپ و بنیامین نەتانیاهو بانگەشەی لەناوبردنی تەواوی هێزە دەریایی و ئاسمانییەکانی ئێران دەکەن، بەڵام ڕاستییەکەی ئاڵۆزترە، بەشێوەیەک بۆردومانەکان زیانی گەورەیان بە شوێنەکانی بەرهەمهێنان گەیاندووە، بەڵام تاران هێشتا خاوەنی جبەخانەیەکی بەهێزە.

پێشبینییە هەواڵگرییەکان ئاماژە بەوە دەکەن کە تەنیا %30ی توانای موشەکیی ئێران تێکشکاوە و لانی کەم 1,000 موشەکی بالیستی لەناو تونێلە قووڵەکاندا پارێزراون، هەروەها بەرهەمهێنانی فڕۆکەی بێفڕۆکەوان بە تێچووی کەم و خێرا بەردەوامە.

ئەوەش هاتووە: مەترسییەکە لەسەر ئیسرائیل کەمبۆتەوە، بەڵام وڵاتانی کەنداو (سعوودیە، ئیمارات و بەحرێن) هێشتا لەژێر هەڕەشەدان. لەم پرۆسەیەدا نزیکەی 2,000 موشەک ئاڕاستەیان کراوە؛ بەهۆی نەبوونی سیستمی بەرگریی بەهێز، ئەوان دەبنە ئامانجێکی ئاسان بۆ موشەکە کورت مەوداکان.

لەکۆتاییدا دەڵێت: مەکینەی جەنگیی ئێران گورزێکی قورسی بەرکەوتووە، بەڵام کۆتایی نەهاتووە، بەوپێیەی بەلەمە خێراکان لە گەرووی هورمز و سەکۆ ژێرزەمینییەکان دەیسەلمێنن کە لە ئەگەری نوێبوونەوەی شەڕدا، ئێران هێشتا دەتوانێت ڕۆژهەڵاتی ناوەڕاست بشێوێنێت.

ئاکۆ عەبدوڵڵا ئاڵی