ئاین لە ناو هەموو کۆمەڵگەکاندا کاریگەری خۆی هەیە، هێزی ئاین بەنەرمی و بە توندی بەکاردێت. ئاین کاتێک کە لەناو گەلێکدا ڕەگوڕیشە دادەکوتێت، دەبێتە بەشێک لە کلتورەکەی و ڕەنگو بۆی ئەو ژینگەیە وەردەگرێت، کە تیایدا پەیڕەو دەکرێت. دەسەڵاتی سیاسی لەهەر نیشتیمانێکدا، یەکێک لەو ئامرازانەی بۆ سەپاندی خۆی بەسەر کۆمەڵگەکاندا بەکاریدەهێنێت ئاینە، هەروەک چۆن بەهێزی یاسا ژیانی خەڵکی ڕێکدەخات.
زۆر جار ئەو دەسەڵاتەی کە نادیموکراسیین، ئاین دەقۆزنەوە بۆ مانەوەی خۆیان، تەنانەت جۆرو شێوازێکی ئاین پەرەپێدەدەن کە لەگەڵ بەرژەوەندیەکانیاندا یەک بگرێتەوەو پێگەیان بەهێز بکات، لەکوردستان دەسەڵات ئاینی باڵا کەئیسلامە بەفەرمی دەناسێت و ئاینە کەمینەکانی تر وەکو مەسیحی و یەزیدی و کاکەیی و زەردەشتی و ئاینزای شیعە، وەکو بونی فرە ئاینی نیشاندەدات کە بەدڵنیاییەوە لەڕوی هزریەوە، هەموو ئاین و ئاینزایەک، مافی بوونی ئازادی خۆی هەیە، لەچوارچێوەی یاسادا، بەڵام دەسەڵاتی کوردی، لە ئێستای کۆمەڵگەی کوریدا، بەهەموو توانای خۆیەوە پەیڕەوی لەسێ جۆر ئاراستەی ئیسلامی دەکات، وەک ئامرازێک ژێربارو بەکاری دەهێنێت بۆ سەپاندی دەسەڵاتی تاکڕەویی خۆی، ئەوانەش:
1.پەیڕەوی سۆفیگەری بە هەردوو باڵی نەقشبەندی و قادریەوە. کە ئاشکرایە ئەو دوو ڕەوتە ڕەگێکی مێژووی قوڵیان هەیە لە کۆمەڵگەی کوردەواریدا و هەوێنی شۆڕشەکانی کوردو کانگای تەقینی بەهرەی زۆربەی شاعیرانی دێرینی کورد بوون و جۆرێک لە جۆرەکان ڕەنگی کوردەواریان وەرگرتووە.
بەڵام دەسەڵاتی سیاسی کوردستان هاتووە بە سیاسی کردوون و دەیان دەستەو تاقمی جیاوازی تیایدا دروست کردوون و بەدەوری دەسەڵاتدا کۆبونەتەوە. ئەم ڕەوتە ئەگەر چی کەسانی پاک و شایستەیان تیادایە، بەڵام بەجۆرێک لە جۆرەکان لە خانەی دەسەڵاتدا پۆلێن دەکرێن و لە ڕووی هزریشەوە، لە ژێر هەڕەشەی ئەفسانەو خورافات و خەوخەیاڵدان و لە گیانی سۆفیگەری ڕەسەنی کوردەواری دووردەکەونەوە، هەم جلوبەرگی ناکوردی دەپۆشن و هەم لە کەش و هەوای سروتە ئاینیە کوردەواریەکان دوور دەکەونەوە، زیاتر وەکو سەرکزی سەلامەت لە زیکروتەهلیلەکاندا خۆیان دەبیننەوە و زەرەریان بۆ پەزەکانی دەسەڵات نیە.
2. ڕەوتی سەلەفی کە تەواو نامۆیە بە کۆمەڵی کوردەواری و لەسەرەتای ساڵی هەشتاکاندا، عەرەبستانی سعودی لە ڕێگەی مامۆستا حەمدی سەلەفی و مامۆستا عومەر چنگیانی یەوە(ئەگەر چی خۆی گوتەنی لەوەتەی بووەتە مەلایی، زۆر کراوەتەوەو زیاتر ئەقڵانی دەردەکەوێت) ، هێنایە کوردستانەوە.
ئێستا ڕەوتەکە سنوری هزری و پاوانخوازی فراوان بووە و هەموو جۆرەکانی لە کوردستاندا باڵا دەستن و بە فەرمی دەسەڵات پشتگیریان دەکات.
بەوەی بەڕێوەبردنی زۆرینەی مزگەوتەکانی کوردستانی بە فەرمی پێ سپاردووە و لە گوندو شارۆچکە کەنارەکان ئەوە، دەیان هێنێتە ناو جەرگەی شارە سەرەکیەکانی کوردستان و پشتیوانیان دەکات و لە ململانێ سیاسیەکاندا، کردوونی بە جێگرەوەی ئیسلامی سیاسی.
لە زۆرینەی مزگەوتەکاندا، هزری پەڕگیریی بڵاودەکەنەوە، بەهەشتی خودا بە شێوەی فەرمی مەتری بەدۆلار دەفرۆشن و دزداشە لە بەرن، ئەگەرچی بۆ فریو جلی کورتی کوردی لە ناوخۆ دەپۆشن، نەورۆز بە کوفر دەزانن و شاعیرانی مەزنی کورد بە لادەرو فاسق دەدەنە قەڵەم و دژی هەموو کرانەوەو پێشکەوتنێکی کۆمەڵایەتی ڕادەوەستن، تەنها ئەوە نەبێت پشتگیری وەلی ئەمری سەردەم بۆ خۆپارێزی و توقیە دەکەن.
3. ڕەوتی ئیسلامی سیاسی بە هەموو باڵەکانیەوە، دەسەڵات پاڵپشتی مانەوەیان دەکات و بەردەوام کۆمەکی ماددیان دەکات و ڕێگەی بانگەوازو کاری پارەکۆکردنەوەیان بە ناوی خێرخوازیە وە بۆ ئاسان دەکات و لە هەموو گەڕەکەکانی شاروشارۆچکەکاندا، بنکەی ئیقرەئو نوری حیکمەیان بۆ دەکاتەوەو لە ئاستێکی دیاریکراودا ڕایان دەگرێت، نە دەهێڵێت بتوێنەوەو نە دەهێڵێت لە سنورێکی دیاری کراو زیاد بکەن_ هەروەک بزنەکەی هەیاسی خاس_تاوەکو هەر هەبن و لە بەردەم دانوستانی ئەمریکی ئەوروپیدا وا نیشانیان بدەن کە بەدیلی دەسەڵاتی گەندەڵی ئەوان ئیسلامی سیاسیە، کە هەم ماکی توندڕەویان هەڵگرتووەو لەڕوی هزریشەور سەربە ئیخوان موسلمینن و غەزە پەرستن. هەم دوژمنی پڕۆژەی ئەمریکی و ئەوروپی و ئیسڕائیلن لە ناوچەکەدا.
ئەنجام: دەسەڵاتی کوردی،بۆ مانەوەی خۆی پشتگیری چەند جۆرێک لە ئیسلامی دەکات و بۆ ئامانجی سیاسی خۆی بەکاریان دەهێنێت، بۆ دەرەوەی خۆشی وەکو کارتی ئیسلاموفۆبیا، لە کاتی گونجاودا لە کێلان دەریان دەهێنێ، کە ئەوەش پیشەی هەموو دەسەڵاتە ستەمکارەکان بووە لە دنیادا.
ئەم وتارە دەربڕی بۆچونی نووسەر خۆیەتی