دانا ڕەشید

سیاسەت بینینی وەک ئەوە نییە بە چاوی ڕون شتێک ببینی ، وەک ئەوە نییە دەست بدەی لە وزەی کارەباوە راتتەکێنێ ، وەک ئەوە نییە ئەستێرەو مانگ یان پەڵە هەورو  خۆر بە ئاسمانەوە ببینیت ، سیاسەت بریتیە لە کۆمەڵێ شت ،بەسەریەکەوە دەبێت بیانبینی ، دەنا  پچڕ پچڕ نەک هەر نایبینی بەڵکو لێشی تێناگەی ، ئیدی بەسەر لێشێواوی دەمێنیتەوە .
هەموو دەزانین  کێشەی کورد و کوردستان یەک کێشەیە لە ئەزەڵدا ، وەلی  بە چوار دیدگای زۆر جیاواز دەکرێ لە سیاسەتی بروانی ،  رۆژئاڤای کوردستان  بە قۆناغ ، قۆناغەکانی خەباتی بەوپەڕی جوانی و لەخۆبوردەیی و هەستیاری و  کچو کوڕە شەرڤانەکانی و لێهاتویی تێپەراند ، هەر ئەو پارچەیە بوو لەم کوردستانە کە هیچ هەناسەیەکی نیشتمانی و نەتەوەیی و مافی نەدەدا ، بە تەعریب و تەبعیس و  لەکەماشەدانی خێڵەکان  لەتوپەتیان کردبوو ،تەنانەت مرۆڤی کورد بەشی زۆریان وەک عەرەبیش ناسنامەیان پێ نەدەدان ، گەلۆ ئەو هەموو هەستە نەتەوەییە ئەو هەموو چالاکی و خەبات و چەلەنگیە ، ئەو هەموو  شەری بێ ئامانە ، ئەو هەموو بەرخودان و بەرگریە ، ئەو هەموو یەکسانی و دیمۆکراتی و جوانیە شارستانیە لە کوێوە سەرچاوەی گرتبوو ؟
قۆناغی یەکەم ،
هەر دوای ڕودانی خۆپیشاندانەکانی بە حساب بەهاری عەرەبی ، کوردەکانی رۆژئاڤا خۆیان کۆکردەوە ، وە دەبێت  جوانترین مەدالیای  شەرەفی کوردانە لەم  کۆکردنەوەیەی کوردا ، بدرێت لە رۆحی خوالێخۆشبوو باوکی شەهیدی قارەمان ، ساڵح موسلیم ،  کە چۆن کچان و کوڕانی گیانبازی کوردستانی لە رۆژئاڤا  رێکخست ، چۆن  ئەو سەرکردەیە لە بەرەکانی پێشەوی جەنگ خۆی و خێزانی دەجەنگان و کورەکەی بەخشی بە نیشتمان ،
قۆناغی دوەم ،
دوای سەرکەوتنی کۆبانێ و روخانی داعش و پاک کردنەوەی رێژەیەکی بەرچاوی خاکی سوریا بە رۆژئاڤاشەوە لەدەست هەم  ژیان کوژەکانی داعش هەم مرۆڤ کوژەکانی رژێمی ئەسەد ، کەش و هەوایەکی باشتر بۆ رۆژئاڤا هاتە گۆڕێ ، لەو کەش و هەوایەدا  پایەکانی نمونەی دەوڵەتێکی دیمۆکراسی و  کە مرۆڤ لەسەر بنەمای هاوڵاتی بژی پێک هات ، حیزب حیزب بێت ، حکومەت حکومەت ، لێرەوە دەوری خەبات گێرێکی وەک مەزڵوم عەبدی پرشنگی دا
قۆناغی سێەم ،
 کاتێ هێشتا رژێمی ئەسەد بەپێوە بوو لەلایەن روسیاو  ئێران و  لە لاشەوە چین پشتیوانی دەکرا، هیوای روخاندنی دوور بوو ، بەڵام خۆ ناشکرێ ئەو سەرزەمینە فراوانەی ئازاد کرابوو لە چنگی ژیانکوژەکانی داعش ، بێ هیچ دەسەڵاتێک بمێنێتەوە ، لە رێککەوتنێکدا لەگەڵ هەموو ئەو خێڵ و عەشرەتانەی ناوچەکان و  کەسایەتی ئەو شارو شارۆچکەو گوندانە ، بەوپەڕی  دیمۆکراسی و ڕاگۆڕینەوە ، پێکهاتن لەسەر ،دروستکردنی بەرەیەکی فراوان ، کە مافی هەموو لایەکی تێدا پارێزراو بێت لەلایەک ، لەلایەکی تریشەوە هێزێک بێت بۆ بەرگریکردن لەو ناوچانە لە دژی داعش و غەیری داعش بە رژێمی ئەسەدیشەوە ، بەرێز مەزڵوم عەبدی بە  فەرماندەی یەکەمی ئەو  هاوپەیمانیە هەڵدەبژێرن، کەناوی لێ نرا ،هێزەکانی سوریای دیمۆکرات ، بە عەرەبی  قوات سوريا الديمقراطية . کە پێکهاتەیەکی  فیعلی بوو بۆ ئەو سەردەمە کارو فەرمانی خۆی بە چاكی پێکا .
قۆناغی چوارەم ،
 دوای ئەوەی بە پلانی ئەمەریکاو  ناتۆ ، کەسێکی کۆن تیرۆرستی  ئیسلامی  وەک ئەحمەد شەرع دروست کراو ، دەسەڵاتی پێدرا کە  سەرکردایەتی ئەو هەڵگەرانەوەیە بکات کە بوە هۆی ڕاوەدونانی  بەشار ئەسەدو رژێمەکەی ، ئیدی لەبەرچاومان بوو ، کۆی گشتی ژیان و سیستەم و پێکهاتە سیاسیەکان لە سوریا دەبێت بەشێوەیەک لە شێوەکان گۆرانکاری بەسەردا بێت ، وەلی تا ڕادەی دوا قەترە وشینی زمانی لێکتێگەیشتن و گفتوگۆ لەنێوان هێزەکانی سوریای دیمۆکرات بەسەر کردایەتی مەزڵوم عەبدی ، گەیشتە ئەو ململانێ گەرم و سەختە کە بینرا تەواوی خاکی کوردستان لە کێشەی رۆژئاڤادا جما ، تەواوی مرۆڤی کورد لە ناوکوردستان و دەرەوەی کوردستان زیاتر لە مانگێک بە پێوە بوون ، هیمەتێکی وا پیشانی هەم داگیرکەرانی کوردستان بەتایبەتی رەجەب تەیب ئەردۆگان و درا کە دوژمنی مافی کوردە ، هەم جیهان و ئەمەریکا درا ،کە گەر وا بزانن ئێوە پشتیوانیەکانتان ببڕن ئاشبەتاڵ ڕودەدات خەیاڵتان خاوە ، کوردستانی ئەمڕۆ کوردستانی ڕابوردوو نییە ، لەسەر ئەم ئەساسە ، بە پێودانگی نەشیش بسوتێ نە کەباب ، بە ئیرادەی پۆڵاینی کوردی هەرچوارپارچەو بە ورەی بەرزی شەرڤانان و سەرکردەکانی رۆژئاڤا ، زاڵ بون بەسەر ئەو هەڵگەرانەوە بێ شەرەفیەی عەرەبەکان و خۆ کۆکرنەوەیان کە وەک کورد بێنە مەیدانی خەبات . ئەمجارە داوای مافی کورد دەکرێت لەو پارچەیەی پێێ دەوترێ رۆژئاڤا
قۆناغی پێنجەم ،
دوای هێور بوونەوەی بارودۆخەکە ، دوای ئەوەی  بە خۆپیشاندان کوردستان پیشانی دنیا درا ، بە مەمنونی هەم ئەمەریکا هەم دەسەڵاتە لەرزۆکەکەی شەرع  هاتنە سەر خەتی گفتوگۆی ئاشکرا ، ئەوە چەند خولی گفتوگۆ بەسەرکەوتویی لەبەرژەوەندی کورد تەواو دەبێت ، قۆناغ قۆناغ لە مافە بنەرەتی و کوردستانی و  خاک و سنور نزیک دەبینەوە ، رۆژئاڤایەک لە خاڵی سفرەوە کە مافی پێدانی ناسنانەیان نەبوو ، ئێستە خۆیان ئەو خاکەی لەئافاتی سەدان ساڵەی  داگیرکاری ماوە بەرێوە دەبەن ، نەک هەر ئەمەش ، بەشداری کاران لەو دیمشقەی کە بەزۆر کراوە بە عەرەب ، تەنانەت پاشگری عەرەبیەش لە سوریا دەکرێتەوە ،  کورد دەستی بۆ پەرزترین پلەو پۆستی تەواوی سوریا بڵند دەکات ، ئەمەیە بڵدێتی ،ئەمەیە مەردێتی ،ئەمەیە سیاسەت ، لە جەنگدا سیاسەت و لە سیاسەتدا جەنگ ،  لە گفتوگۆدا ململانێ و لە ململانێدا گفتوگۆ ، بژی رۆژئاڤا بژی کوردستان

ئەم وتارە دەربڕی بۆچونی نووسەر خۆیەتی