بە تێگەیشتنەكەی هنری كیسنجەر دیپلۆماسییەت لە واتا كلاسیكییەكەیدا ڕێكخستنی جیاوازییەكانە لە رێگەی دانوساندەوە. بەڵام بە نیسبەت كوردەوە لەواتاى كلاسيک و مۆدێرندا فۆڕمی واتا تەقلیدییەكەی دانوساندن تێدەپەڕێنێت، دیپلۆماسییەت واتای ئامادەگی شوناسە لەسەر مێزی یار و نەیار. جەوهەری ئەو شوناسەش وابەستەیە بە بەهای بوون(وجود)ەوە.
دواین سەردانی سەرۆكی هەرێمی كوردستان بۆ توركیا و كۆبوونەوەی لەگەڵ سەرۆك كۆماری توركیا و سەرۆكی ڕاگوزەری سوریادا ئەحمەد شەرع، جگە لە تیشکخستنە سەر پێشهاتە هەستیار و گەرمەكانی ناوچەكە، بەرێوەبردنی قۆناغێكی تری پڕۆسەی ئاشتی نێوان( توركیا و ئیمراڵی، ڕۆژئاوا و ئەحمەد شەرع+توركیا)یە كە خودی سەرۆكی هەرێم كارەكتەری كارای داینەمیكی سەرپێخستن و بەڕێوەبردنیی پرۆسەكەیە. لێكەوتە حەتمی و ئەگەرییەكانی پرۆسەكە مانۆڕ و جوڵەسیاسییەكانی داهاتووی باكور و ڕۆژئاوای كوردستان لە قاڵبدەدەن.
ئەگەر پرسی ئاشتی لە رۆژهەڵاتدا بۆ خۆلادان بێت لە جەنگ یاخود بەرئەنجامی شكستی جەنگ بێت. هیچ لەو ڕاستییە ناگۆڕێت پڕۆسەكە دەكرێت ببێت بە ئامڕازی بەرهەمهێنانی پێكەوەهەڵكردن. بۆ كورد بەهای لە پێكەوەهەڵكردنیش زیاترە، ئەویش ئەو تەكنیكەیە كە تێیدا جینالۆژی میراتگیری ئیمپراتۆریەت داندەنێت بە شوناسی كورد دا.
دەبێت ئەو ڕاستییە لە بەرچاو بگرین هەتا هەنوكەش خەیاڵدانی عوسمانیزمی توركی بەشی هەرە زۆری جوگرافیای كوردستانی گەورە بە میراتی ئیمپڕاتۆریەتەكەی خۆی لە قەڵەم دەدات، هەرچەندە پراكتیزەی ئەو نیازە ناكردەییە بە حكومی گۆڕانی مەنتقی هێز لە ناوچەكەدا، بەڵام بە بەدیدێكی واقیعییانەتر دەكرێت ئەم تێڕوانینە پێچەوانە بكرێتەوە و كورد توركیا بكات بە قوڵای جیپۆلەتیكی خۆی. كۆمەڵیک فاكتەر هەمانهەنگی دەبن لە پیویستبوونی ئەو ستراتیژیەتدا، لەوانە بەشێكی خاكی كوردستانی گەورە و ژمارەیەكی زۆری كوردی باكوری كوردستان لە ناو سنوری دەوڵەتی توركیادا وە بوونی سنورێكی فراوانی نێوان توركیا و كوردستان...هتد.
پێویستە ئاماژە بەوەش بكەین، لەبەر ئەوەی كورد بوونێكی نا دەوڵەتییە، نوێنەرایەتی دەرەكی فەرمی سنوردارە ، كارامەیی دیپلۆماسییەتی نێچیرڤان بارزانی دەرفەتێكی باشە بۆ پڕكردنەوەی ئەو كەلێنە و دەتوانێت نوێنەرایەتی سیاسەتی دەرەكی و بەرژەوەندییە نەتەوەییەكان بكات. (بروس جینتلسۆن) مامۆستای زانستە سیاسییەكان لە زانكۆی دۆک"بەروپێشبردنی سیاسەتی دەرەوە و ناساندنی بەرژەوەندییە نەتەوەییەكان بە بەشێكی گرنگی بنەما سەركییەكانی سیاسەت دادەنێت" بۆ كورد ئەم دوو بنەمایە لە سیاسەتی سەركەوتو بەولاترە و دەبێت بە ئامرازی هاوسەنگ ڕاگرتنی ستراتیژیەتی دەرەكی لە ناو ئەو كۆنتێسكتانەی دیمەنی داهاتووی سیاسی ناوچەكە ڕەسم دەكەن.
تێمای دیپلۆماسییەت بۆ كورد ڕەهەندێكی سایكۆلۆژی هەیە ئەویش ڕەواندنەوەی ترسی ئەو تێگەشتنە ناو زهنی تاكدایە كە( هەموو ئاشتییەكانی ناوچەكە لەسەر حیسابی تەسفییەی كورد تەواو دەبێت). ئیستا كورد خۆی جەمسەری سەرمێزی پڕۆسەكانی ئاشتی ناوچەكەیە. ئەگەر جاران نەیارانی كورد ئاشتیبووبنەوە لەسەر باڵانس تەسفیاتی كورد، ئێستا ئەم نەتەوە دیپلۆماسییەتێكی لێهاتووی هەیە و نوێنەرایەتی سیمبول و تەكنیكی دانوساندنەكانی دەكات.
لە كۆشكی ئاك سەرای توركیاوە بۆ كۆشكی ئێلزەی فەڕەنسای ناوەندی دیپلۆماسییەتی جیهانیی.
ئەم وتارە دەربڕی بۆچونی نووسەر خۆیەتی