فوئاد جەمال

کاتێک جیهان لە ترسی تاریکیی داعش دەلەرزا، کاتێک تیرۆر هەڕەشەی لە پایتەختەکانی ئەوروپا و تەواوی مرۆڤایەتی دەکرد، تەنها پێشمەرگە و شەرەڤانانی ڕۆژئاوا بوون کە بە سنگێکی فراوانەوە ڕووبەڕووی ئەو دڕندەییە بوونەوە. ئێمە لە پێناو ئارامی و ئاشتیی جیهان، هەزاران ڕۆڵەی خۆمان کردە قوربانی و خوێنی گەنجەکانمان لە کۆبانێ و ڕەقە ڕژا تا جیهان لە مەترسیی تیرۆر ڕزگاری بێت.
شاری حەلەب، بەتایبەت گەڕەکە کوردییەکانی وەک شێخ مەقسود و ئەشرەفییە، جارێکی تر بوونەتەوە بە چەقی ململانێیەکی خوێناوی. ڕژێمی سووریا کە لە پاراستنی هاووڵاتیان شکستی هێناوە، و لە لایەکی ترەوە هێرشی گروپە چەکدارە توندڕەوەکان کە هیچ ڕێزێک بۆ مافی مرۆڤ و بوونی کورد دانانێن، کوردانی ئەو شارەیان خستووەتە بەردەم مەترسییەکی گەورەی نەتەوەیی.
ئەوەی لە حەلەب ڕوودەدات تەنها شەڕێکی سەربازی نییە، بەڵکو هەوڵێکی ئاشکرایە بۆ سڕینەوەی ناسنامەی کوردی و گۆڕینی دیمۆگرافیای ناوچەکە. دەستدرێژی بۆ سەر ماڵ و سامانی کوردان، گەمارۆدانی توندی گەڕەکەکان، و بێبەشکردنی خەڵک لە پێداویستییە سەرەتاییەکانی ژیان، بەشێکن لەو سیاسەتە چەوسێنەرەی کە دەرهەق بە نەتەوەکەمان دەکرێت. ئەم هێرشانە نیشانی دەدەن کە هێشتا لۆژیکی عەقڵێتی شۆڤێنی و توندڕەوی لە ناوچەکەدا باڵادەستە.
پێویستیی یەکگرتوویی کورد لەم قۆناغەدا
لە کاتێکدا کە دوژمنان و نەیاران لە هەموو لایەکەوە بۆ لاوازکردنی پێگەی کورد ڕێککەوتوون، یەکگرتوویی نەتەوەیی کورد لە چوار پارچەی کوردستان تاکە قەڵایە کە دەتوانێت بمانپارێزێت. قۆناغی ئێستا دەخوازێت کە:
1.     هەموو هێز و لایەنە سیاسییە کوردییەکان ناکۆکییە لاوەکییەکان وەلا بنێن.
2.     گوتارێکی سیاسی یەکگرتوو لە ئاستی نێودەوڵەتیدا پەیڕەو بکرێت.
3.     پشتیوانی سەربازی و مەعنەوی بۆ شەرەڤانان و بەرگریکارانی حەلەب و ڕۆژئاوا وەک ئەرکێکی نەتەوەیی ببینرێت.
 ڕەوەندی کوردی پەیامی بۆ حکومەتە ئەوروپییەکان:
•      ناتوانن مێژوو فەرامۆش بکەن؛ ئەو شەرەڤانانەی دوێنێ هاوپەیمانی ئێوە بوون لە دژی تیرۆر، ئەمڕۆ لە حەلەب  لەژێر هێرشی هەمان ئەو گروپانەدان کە جیاوازییەکی فکرییان لەگەڵ داعش نییە.
•      ڕێگەدان بە تورکیا و ڕژێمی سووریا بۆ تێکشکاندنی ئیرادەی کورد، واتە سەرهەڵدانەوەی توندڕەوی کە سەرەنجام ئاسایشی ئەوروپاش دەخاتە مەترسییەوە.
 بۆ ڕەوەندی کوردستانی لە ئەوروپا
ئێمە، وەک دەنگی ڕەسەنی گەلەکەمان لە ناوەندەکانی بڕیاردانی جیهاندا، ئەرکێکی مێژووییمان لەسەر شانە. کاتی ئەوە هاتووە هەموو وەک یەک دەنگ ڕاپەڕین:
•      پەیوەندی بە دەسەڵاتدارانەوە  بکەین و داوا لە حکومەتەکانی ئەو وڵاتانە بکەین کە تێیدا نیشتەجێن (وەک ئەڵمانیا، فەرەنسا، بەریتانیا و هتد) فشار بخەنە سەر لایەنە شەڕکەرەکان بۆ ڕاگرتنی هێرشەکان بۆ سەر کورد.
•      بەڵگە و دۆکیۆمێنتەکانی دەستدرێژییەکان بگەیەننە ڕێکخراوە مەدەنییەکان ،ڕێکخراوەکانی مافی مرۆڤ، بۆ ئەوەی بێدەنگی نێودەوڵەتی بشکێنرێت.
•      خۆپیشاندانی جەماوەری: پایتەختەکانی ئەوروپا بکەینە مەیدانی هاوارکردن بۆ مەزڵوومیەتی گەلی کورد. با جیهان بزانێت کە کورد لە هیچ شوێنێک بە تەنها نییە و ڕەوەندی کورد پشتیوانێکی پۆڵاینە بۆ بەرخۆدانی ڕۆژئاوا.
•      ئەم ڕاستییە مێژووییە بیبەینە ناو پەرلەمانەکان و سەر شەقامەکان. بە وڵاتانی خانەخوێ بڵێین   ئێمە خوێنمان دا بۆ ئارامی ئێوە، ئێستا نۆرەی ئێوەیە بە هەڵوێستێکی مرۆڤانە ڕێگری لە کۆمەڵکوژیی گەلەکەمان بکەن

بژی بەرخۆدانی شەرەڤانان سەرکەوتن بۆ ئیرادەی گەلی کورد.

ئەم وتارە دەربڕی بۆچونی نووسەر خۆیەتی