کوردانی کەرکوکی خۆڕاگر،
لە هەڵبژاردنی ئەنجومەنی پارێزگاکانی عیراق، ناسۆرییەکانی چەندین ساڵەیان لەبیرکرد
و بەدەنگەکانیان کوردستانیبوونی شارەکەیان سەلماندەوە، زۆرینەمان دوای ئەو ئەنجامە،
کە دەبوو زۆر باشتریش بێت ئەگەر حزبەکان یەکگرتووبوونایە، چاوەڕوانی ئەوەمان لێدەکردن
ناکۆکییەکانیان وەلاوەبنێن و بەیەکگرتوویی پارێزگارێکی کورد بۆ کەرکوک هەڵبژێرن، کەچی
ئەوەشیان نەکرد.
کەرکوک وەکو سلێمانی و
هەولێر نییە، بەڵکو وەکو مەهاباد و ئامەدە، ئەوان لەبەردەم پرۆسەی تەفریس و تەتریکن
و کەرکوکیش پرۆسەی تەعریب، بۆیە مەترسییەکانی سەر ئەوان یەکجار گەورەن و پێویستیان
بە کوردایەتییەکی راستەقینە هەیە نەک موزەیەف.
دانانی پارێزگارێکی
کورد بۆ کەرکوک، ئەرکێکی هەنووکەیی و گرنگە، شەڕی سەلماندنەوەی ناسنامەی راستەقینەی
شارەکەیە، هەر کەمتەرخەمییەک باجەکەی قورس دەبێت و جگە لەوەی بۆ ماوەیەک کورد دەسەڵاتی
نابێت لە شارەکە، هاوکات دەبێتە هۆی بێهیوابوونی کەرکوکییەکانیش لەوەی دڵسۆزیی و بەشداریی
راستەقینەیان لە سەرخستنی لیستی کوردی هیچ بەهایەکی نییە و نەبووە.
کورد لە کەرکوک سەرکەوتن
و شکستی کەوتووەتە دەستی خۆی، یەکگرتوویی سەریان دەخات و ناتەباییش دەبێتە هۆی سەرکەوتنی
ئەوانی دیکە، هیچ هۆکار و بیانوویەکیش بۆ روودانی ئەگەری دووەم نییە جگە لە نادڵسۆزی
و خەمساردی و بانگەشەکردن بۆ کوردایەتییەک کە راستەقینە نییە.
ئاسانە بۆ یەکێتی و
پارتی لە هەولێرەوە رێکبکەون و کوردستانیبوونی کەرکوک نەدەنە دەست قەدەری سیاسی و
سەربازیی هێزگەلێک کاری یەکەم و کۆتاییان بۆ ئەوەیە شارەکە لەڕێگەی یاساوە تەعریب
بکەن و دوای چەند ساڵی دیکەیش ئاسانتر بتوانن بەدەنگ بەسەر کورددا سەربکەون، ئەوکات
بڕیاربەدەستانی کوردستان مێژوویەکی رەش تۆماردەکەن و ناتوانن بڕوا بە نەوەی
داهاتوو بهێنن کە دڵسۆز و خەمخۆری کەرکوک بوون.
پارێزگار لەهەر هێزێکی
کوردی بێت گرنگ نییە، بەڵکو ئەوە گرنگە عەرەب یان تورکمانێک نەبێتە پارێزگاری شارێکی
رەسەنی کوردستانی کە سەد ساڵ زیاتر لەپێناویدا خەبات دەکرێ و رۆڵەی کوردستانی خوێنی
خوی بۆ پاراستنی ناسنامەکەی دەبەخشێ.
کاتێک حزبەکان بەناوی
کوردایەتییەوە دەیانەوێت یەکتر بشکێنن، ئەوا دەبێ بزانن شەهیدانی کوردستان لەناو گۆڕی
پیرۆزیاندا ئازار دەچێژن و رووناکی مەنزڵیی پیرۆزیان بە رەشەبای بەرژەوەندیی تەسکی
حزبایەتی دەکوژێتەوە، لەوەش دڵنیادەبنەوە خوێن و رۆحیان بەهایەکی نەماوە و هەڕاج دەکرێ.
ئەم وتارە دەربڕی بۆچونی نووسەر خۆیەتی