هەر بۆ زانیاری و بەرچاوڕونی، هێزەکانی سوریای دیموکرات ژمارەیان نزیکەی سەد هەزار کوڕو کچ (ژن و پیاو)ی جەنگاوەری چەکداری ڕاهێندراو لەسەر دەستی ئەمەریکا و پڕچەککراو بە چەکی ئەمەریکی!
پرسیارە گەوهەرەکە ئەوەیە، چۆن و بە کام لۆجیک ئەو هەمو چەک و تەقەمەنیە ئەمەریکیە بە سوپایەکی تیرۆرستی سەر بە قاعیدە و داعش یان بە هێزیکی سەلەفی جیهادی دەدرێ؟ تێکەڵکردنی ئەو واتایە دەگەیەنی.
وەڵامەکە زۆر ئاسانە، نمونەی زیندوی هەردو کوشتارگەی هەفتەی ڕابردوی دروزەکان و پێشتریش عەلەویەکان لە چەند مانگی ڕابردو لەسەر دەستی ئەو بەناو سوپایە نەبو؟؟ بەڕای من هەتا ناکرێ گریمانەشی لەسەر بکرێ بۆ تێکەڵاوکردنی هێزەکانی سوریای دیموکرات لەگەڵ ئەو سوپایە سەلەفیە جیهادیە تیرۆریستە سەر بە ڕێکخراوی قاعدە و داعش!!! فەلسەفەی ژن ژیان ئازادی و فەلسەفەی سەلەفی جیهادی دو فەلسەفەی جودان، هەرگیز تێکەڵی یەکتری ناکرێن.
بە بڕوای من ئەگەر ئەو هێزە نەمینێ لە ڕۆژهەڵاتی ناوەڕاست، بەرژەوەندی ئەمەریکا، ئەوروپا، ئیسرائیل، وڵاتانی کەنداو، عیراق، ئوردن، هەتا ئێرانیش دەکەوێتە مەترسی! نەمانی ئەو هێزە تەنها و تەنها لە بەرژوەندی تورکیایە و بەس.
هێزەکانی سوریای دیموکرات، ئازاد و خاوەن پرینسیپ بوە بە کارەکتەرێکی جیهانی!! هیچ کەسێک ناتوانێ ئەو هێزە فەرامۆش بکا و تێکەڵ بە سوپایەکی تیرۆرستی سەلەفی جیهادی بکا، بە سەدانی وەک (تۆماس باراک)یشەوە! هاوسۆزی و پشتیوانی گەلی ئەمەریکا ئەوە قبوڵ ناکا، لە پاڵ ئەوەش ئەو کچ و کوڕە جەنگاوەرانەی (هسد) خۆشەویستی کۆمەڵگەی مرۆڤایەتین و هەمو کەس ئامادەیە بەرگریان لێبکا.
هەمومان لەبیرمانە لە تێرمی یەکەمی ترەمپ کە فەرمانی پاشەکشێی هێزەکانی ئەمەریکای دەرکرد بۆ کشانەوە لە ڕۆژئاڤا، کەمتر لە شەوڕۆژێک گەلی ئەمەریکا فەرمانەکەیان هەڵوەشاندەوە و هێزەکانی ئەمەریکایان گەڕاندەوە شوێنی خۆیان.
ئەم وتارە دەربڕی بۆچونی نووسەر خۆیەتی