عەبدولرەزاق شەریف

 ئەو ساڵە، دەڤەری سەوز و ناوچەکانی ژێر دەسەڵاتی ئێمە، فشار و گەمارۆی ئابوری و سەربازی توندی هەرسێ دەوڵەتی "عێراق، تورکیە و ئێران" ی لەسەر بوو، هێزەکانی پارتی چەند مانگێک پێشی ئاب بەپشتیوانی ئێرانیەکان وێڕای ئەوەی خۆیان لەهەڵەبجە و شارەزور و سورێن بون! دەشتی شلێر و پێنجوێن و ناڵپارێز و شارباژێڕی سەختیشیان کۆنترۆڵکرد و گەیشتنە تخوبی چوارتا و قەڵاچوالان، بنکەی سەرەکی مەکتەبی سیاسی و ماڵی مامجەلالیش لەوێ بون.
 بەناچاری لەگەڵ ئێرانیەکاندا، رێککەوتین، هەندێک کاری سەربازی، ئەمنی و  مەیدانی هاوبەش هاتە ئاراوە. بیانییەکان، بەتایبەتی تیمەکانی (C I A) و بنکەکانی هێزی هاوپەیمانان لە (سلۆپی) لەو پەیوەندییەی ئێمە، تەواو دڕدۆنگ و بێزار ببون.
 بەرهەم ساڵح، وەک نوێنەری ئێمە لەواشنتۆن چەند جارێک مامجەلالی لەو نیگەرانیانەی ئەمریکییەکان ئاگادارکردەوە، دوا ئاگادارکردنەوەشی نامەیەک بوو کەتیایدا، تیمێکی (C I A) لەسەرچناری سلێمانی، زانیاری و مەترسی خۆیان لەتیرۆرکردن و ڕفاندنیان لەلایەن گروپێکی ئیتلاعاتی ئێرانەوە ئاشکرا کردبوو، داوای لێکۆڵینەوە و رونکردنەوەیان لەئێمە دەکرد، لەقایل نەبونا هەڕەشەی کشانەوەیان لەسلێمانی و ناوچەکانی ژێر دەسەڵاتی ئێمە کردبوو.
   پارتی و دەزگای پاراستنەکەی بەمەیانزانی، لەوبارەیەوە چەند بەڕەیەکیان بۆ خستبوینە مزگەوتەوە. ئێمەش وەک روداوێکی راگوزەر وێڵمانکرد، بەتایبەت ئەو سەروەختە مامجەلال سەرگەرمی رێککەوتنەکەی ئێران و مەستی نەخشەی گرتنی (سەری رەش) بوو! هیچ گرنگی بەو هەڕەشە و نیگەرانیانەی ئەمەریکا نەدا، ئەوانیش تیمەکەیان کشاندەوە.
 سەرەتای ئابی ساڵی نەوەدوشەش، هێزێکی تۆکمەی ئێمە لەتخوبی کێلەشین و سیدەکانەوە بەناو خاکی ئێراندا، بەنهێنی ئاودیوی بەرزایی و چیاکانی پشتی سۆران و مێرگەسور بون بەڵام بەهۆی خیانەتی چەند کەسێکی ناوخۆیان، هێزەکانی پارتی پێش جێبەجێکردنی پلان و نەخشەکە، لەناوەختا پەلاماریاندان و تەفروتونایانکردن! دواتر بارزانی وەک ئاماژەیەک بۆ ئەو نەخشە و پلانە وتی (گۆڕێکیان بۆ هەڵکەندبوین دەیانویست بمانخەنە ناویەوە).
  ئێوارەی پێش هێرشەکەی هەولێر، کۆسرەت رەسوڵ، لەکۆبونەوەیەکی مەکتەبی سیاسیدا، پێشیازیکردبو بەبێ تەقە هەولێر چۆڵبکەین و بەرەو دێگەڵە وکۆیە بکشێینەوە، بارگە وبنە بپێچینەوە، ئەرشیفی دامودەزگاکانی حکومەت و حیزب لەهەولێر دەربکەین وبانگەوازێکیش بۆ کۆچ و ڕەوی خەڵکی هەولێر بۆ پشدەر و بتوێن و ناوچەکانی سلێمانی بکەین. سەرنجی کۆمەڵگەی نێودەوڵەتی و ڕای گشتی دنیا، جارێکیتر لەمەترسی پەلاماردانی سوپای عێراق ئاگادار بکەینەوە.
 خۆ بەپاڵەوانکردنی هەندێکیان و باسی بەرگری و شەڕی کۆڵان بەکۆڵان پێشنیازەکەی سەرۆکی حکومەت وەک ترسنۆکی وتەسلیمبون لێکدرایەوە، لەوەڵامیشدا، پێیاندەڵێت (ئەمن دەزانم شەڕ روبدات هەربەخۆم دەیکەم و ئێوە هەردێن، ئەو موزایەدەیەی لۆ دەکەن).
 بەیانی زوو، شەڕ دەستیپێکرد و قسەکەی ئەویش هەروا دەرچوو.
 ئەو بەیانیەی سیویەکی ئاب مامجەلال لەقەڵاچوالان، هاتبوە مقەڕەکەی ئێمە، بەتەنیا و لەراڕەوی نێوان ژورەکانا پیاسەی دەکرد، لەبەرخۆیەوە قسەی لەگەڵ خۆیدا ئەکرد. سەعات یانزەی بەیانی هیچ پەیوەندییەکمان بە (هێرۆ خان) ەوە نەما. لەدیارنەمان و بێدەنگ و بێ هەواڵی هێرۆ خانا، هەواڵی بەدیلگرتنی هەندێک سەرکردەمان ژنەفت.
 مامجەلال هەربەسەر پێوە چەند دێڕێکی نوسی و هەرخۆشی دایەدەست برادەرەکانی ژوری بێسیم، پێش ئەوەی بروسکەکە ببینم، بۆ یەکەمجار فرمێسکی چاوی مامجەلالم وەک شاخێک لەڕوخاندا، بینی! ساڵانی دواتر و بۆ جاری دووەم ئەوکاتەی لەسەر تەخت و تایەی نەخۆشییەکەی بوو! هەمان فرمێسکم لەچاوی مامجەلالدا، بینییەوە، دروست ئەو دەیقەیە بو کەنەوشیروان مستەفا دەستی خستە ناو دەستییەوە.
 دووەمجار ئەمزانی بۆ بەڵام یەکەمجار هەتا نەچومە ژوری بێسیمەکە و دوو دێڕی بروسکەکەم نەخوێندەوە، لەو فرمێسکانە تێنەگەیشتم کە ببونە وشە و نوسیبوی :
  ( لەمامجەلالەوە بۆ کاک کۆسرەت ...
 دەنگت بەهێرۆ گەیشت بەناوی منەوە پێی بڵێ هەرکات زانی دەکەوێتە دەستی دوژمن داوای لێدەکەم خۆی بکوژێت، نابێت بەزیندویی دەستی دوژمن بکەوێت )
 هێرۆخان، لەپێش نیوەڕۆی سیویەکی ئاب لەگەڵ کەرتێک پێشمەرگەی سکرتاریەت، بەیاوەری عومەر فەتاح، لەناو جەرگەی هەولێر بەقنەشەڕ کەوتبونە ناوکۆڵانەکانی پشتی سکرتاریەتەوە، خەڵکوخوا لێیان دەئاڵێن! زۆر کەس لوتفی هاوەڵی و میوانداری و خانەخوێیی بۆ دەنوێنن، لەوەڵامی هەمواندا، دەڵێت:
 + هەرکەس زەمانەتی پاراستنی ژیانم لەهێزەکانی پارتی و حیزبی بەعس دەکات من میوانی ئەو دەبم!
 لەناو ئاپۆرەی خەڵکەکەدا، کەسێک وەک تەلیسم و ئەفسونی ئەسپەکەی بوراق! لەو جەجاڵی دنگی تۆپ و گوللەیەدا، لەو هاواری حەشامەتەیا، چپەیەک بەگوێچکەیدا ئەکات:
- بەبێ دەنگی و نەدیوی بچۆرە پشتی دەرگای کراوەی ئەو ماڵە دوو قاتەی بەبەردی حەلان دیکۆر کراوە، خاوەن ماڵ بەڵێنی پاراستن و زەمانەتی ژیانت پێدەدات و مردنی خۆی پێش دەستگیرکردنی تۆ دەخات!
 هێشتا بڵاوەی بەهێزەکەی دەوری خۆی و خەڵکەکە نەکردبو، خۆی و عومەر فەتاح وحامیدە سور، بەتاقم وتفەنگ وجانتایەک پوڵ و پارەوە بەنەدیوی خۆیان بەو ماڵەدا ئەکەن، بەجۆرێک هێزەکەش بڵاوە پێدەکات هیچ کەس نەزانێت چۆن و کەی لەچاوی هەمویان بزر بوو!
 چەند رۆژێکی کەم لەبێ هەواڵی ئەوان وەک ساڵانێکی زۆر لای ئێمە تێپەڕی! خانەخوێ نامەیەکی هێرۆخان لەدێگەڵە بەکاک کۆسرەت دەگەیەنێت و هەر ئەو دەیقەیە بروسکەیەک بۆ مامجەلال دەکات ودەنوسێ :
  ( لەکۆسرەت بۆ مامجەلال  ...
 هێرۆخان لەشوێنێکی ئەمیندایە لەناو هەولێر، بەزوترین کات دێتەوە بۆلات )
  رۆژی دواتر ...  بەهیمەتی خۆی کەسێکی تایبەت بەئۆتۆمێلێکی تایبەت و پەرلەیەکی تایبەت هەرسێکیان (هێرۆخان، عومەر فەتاح و حامیدە سور) گەیشتنە دێگەڵە و گونیە پارەکەشیان وەک پەساپۆرتی دەربازبوون، بەسەر پێشمەرگەی سەیتەرەکانی پارتیدا، بەخشیبۆوە. ⊕
                                                      -----------------------------
 ⊕ روداوەکانی ئەو چەند رۆژەی دیارنەمانی هێرۆخان زۆروزەوەندن، بەبێ روخسەتی کاک (حامیدە سور) کەخۆی بۆی گێڕاومەتەوە پێم باش نەبوو زیاتری لەسەر بنوسم .

ئەم وتارە دەربڕی بۆچونی نووسەر خۆیەتی