بەوپەڕی قەناعەتمەوە بیركردنەوەم وایە كە هیچ سنورو دەوڵەت و بازگەیەك نەبێت لەم رۆژهەڵاتی ناوەڕاستە، لە هەولێرەوە بەمیترۆ بچمە تاران و لەوێش بڕۆمە ئەنقەرەو دوایی بە شاری بەغداوە بێمەوە سلێمانی و هیچ پاسپۆرت و بازگەشی نەوێت. تەنانەت دراوی هاوبەشیش هەبێت. بەڵام ئێوە تەماشا بكەن كوڕی شای ئێران هێشتا ئاوارەیە!! پەنجا ساڵە لە وڵاتەكەی دوورە, لە تەختی دەسەڵات نیەو هیچی بەدەست نیە, كەچی یەك بست چیە, یەك تاڵە موو چیە لە مەعدەن و زهن و جیناتی نەگۆڕاوەو دەڵێت یەك پارچەیی ئێران لە هێڵی سور سورترەو كورد هیچ نین و یەك بست خاكیان نیەو سوپا دەنێرم قەتلوعامیان بكات.
رێك و راست ئەوەیە كە شێخ سەعیدی پیران دەفەرموێ: تۆ لەبیرت چۆتەوە كە كوردی، بەڵام داگیركەران هەرگیز لەبیری ناكەن كە تۆ كوردی.
سەیرە تورك و عەرەب و فارس لەم جوگرافیە دەستكردەی دوای جەنگی جیهانی یەكەم، تاڵی و سوێری و خوێنڕشتن و ئاوارەیی نەماوە نەیبینن، برسیەتی و بێكاری و دواكەوتوویی نەما نەیبینن، هەر ئێستا نزیكەی دراوی ئێرانی 16 ملیۆن تمەن بە سەد دۆلارە، ئەوە لیرەی سوری و توركی و دیناری عێراقیش سەیر بكە. ئینجا ئەم نەتەوانە لەم جوگرافیە بۆگەنە سەری زمان و بنی زمانیان نەتەوەپەرستی و سنورپەرستی و دەوڵەت پەرستی خۆیانە, بۆیە كورد لەدوای شەڕی حەلەب و رۆژئاوای كوردستان, لەدوای ئەم هەموو روداوانەی لە پەنجا ساڵی رابردووی ناوچەكە روویداوە، لەدوای ئەم هەموو چەوسانەوەو قوربانی دانە، تاكە گوتارێك دەبێت زۆر پێداگیری لەسەر بكات ناوی (كوردستان)ە, هەر كوردێك سەربەخۆ خوازو ئینفصالی و جیاخواز نەبێت، خزمەتكاری تورك و فارس و عەرەبە. باشترین گوتارو تێكۆشانی كورد ئەوەیە پێداگیری لەسەر جوگرافیای كوردستان بكات، دەوڵەت و سەربەخۆیی دەرمانی یەكەم و كۆتاییە. تۆ رۆژانە نكۆڵیت لێ دەكرێت، ئەنفال دەكرێیت، خوێنت دەڕژێت، بەردەوام قوربانی دەدەی، كەواتە بۆچی داوای سەربەخۆیی ناكەیت؟ خۆ لەوە زیاتر نابینە قوربانی؟. ئەم هەموو قوربانی و دەردی سەری و خوێن ڕشتنە هاوتاكەی جوگرافیای كوردستانە, نەك دابەزین بۆ داواكاری هەندێك ماف. بۆیە ئەگەر پێداگیری لەسەر سەربەخۆیی بكەین هەر ئەوەندە دەكوژرێی و لێت دەدەن؟.
دەبێت داواكاری كورد زۆر بەرز بن. نابێت بەمجۆرە خۆت لە قاڵب بدەیت. (دەبێت لەدوای شەڕی رۆژئاوای كوردستان تەواوی قوڵایی ستراتیژی كورد لە هەر چوارپارچە بگۆڕدرێت، دەركەوت جگە لە گوتاری سەربەخۆیی و ئینفصالی، تەواوی گوتارەكانی تر هیچ بۆ كورد دەستەبەر ناكەن).
ئەوەتا پێنج حزبی رۆژهەڵات بە شكۆوە هاتون گوتارێكی هاوبەشیان واژۆ كردووە، داوای سەربەخۆیی و جیابونەوەشیان نەكردووە، كەچی كوڕی شای ئێران دێت ئاوا هەڕەشەی ئەنفال كردنت لێ دەكات, كە قسەكەی راستەو ئەوان ئاوا بیردەكەنەوەو ئەوە قسەی دڵی توركیاو عێراق و سوریاو ئێرانە, كوڕی شا راستگۆیانە دواو نەهات بەدرۆ باسی مەرسوم دەركردن و مافی كوردو ئاشتی و چارەسەری بكات و لەولاشەوە خەریكی كوشتنی ژن و منداڵی كوردو سڕینەوەت بێت. ئەگەر كوڕی شا باسی مافی كوردی كردبوایە ئەوا جێگای پرسیار بوو، چونكە ئەوان و مافی سیاسی و جوگرافی كورد كوجا مەرحەبا؟ بەڵكو هاتووە راست و دروست قسەی خۆی كردوە. ئێمەی كوردیش دەبێت بزانین تاكە چارەسەر بۆ ئێمە جوگرافیایەكە ناوی (كوردستان)ە.
ئەم وتارە دەربڕی بۆچونی نووسەر خۆیەتی