ئارێز عەبدوڵا

ساڵ و نيوێك بەسەر هەڵبژاردنی پەرلەمانی کوردستاندا تێپەڕيوە، کەچی هێشتا کابينەی دەسەڵات پێکنەهاتووە!
بەسەر چوونی ماوەی ياسايی و درەنگ کەوتنی پێکهێنانی کابينە جگە لە بێباکی دەسەڵاتداران  بەرامبەر چارەنووس و ئايندەی گەل هيچی تر ناگەيەنێ.
پاساوی پێکنەهێنان و ئۆباڵ بەخشينەوە ئەستۆی ئەوانە پاك ناکاتەوە کە بەم شێوەيە لە پێناوی بەرژەوەنديی تايبەت ياری بە چارەنووسی ئەم گەلە چارە ڕەشە دەکەن.  هۆکاری پێکنەهێنان تەنيا ئەوەيە کە نە ئەنجامی هەڵبژاردن و نە هەلومەرجە ناوخۆييەکان لەبەر چاو دەگيرێن!
باشە بۆچی ئەو دوو راستيیە رەچاو ناکرێن؟
پارتی دەڵێ: من هێزی يەکەمم و ژمارەی کورسيەکانم زياترن.
يەکێتی دەڵێ: ئەگەر بێی من دەتوانی کابينە پێکبێنی ئەوە ئەرز  و ئەوەش گەز.
لە ڕاستيدا ئەو دوو رستانە هەردووکيان ڕاستن، بەڵام هيچيان لەبەرژەوەنديی گشتی نين، چونکە بەرژەوەندیی گشتی بە سازان و رێککەوتن دەستەبەر دەبێ، نەك عينادی و ململانێی بێ ئەنجام.
 تو بلێی پارتی ئەوەندە بێئاگا بێ، نەزانێ کە لەم قۆناغەدا باسەکە بە ژماەری کورسیان نابڕێتەوە، تەنانەت ئەگەر گەياندیيە پەنجا و دووش؟
نا، بێگومان دەزانێ، بەڵام لەبەر ئەوەی لە لايەك لە بەڕێوەبردنی وڵاتدا بڕوای بە هاوبەشی نييە، لە لايکی ديکەش پێم وايە هيوای لەسەر هەندێ گۆڕانکاری و ئەگەری نەزۆک هەڵچنيوە بۆيە پەلە ناکات و چاوەڕوانی هەڵبژاردوە، بەڵام
 دەبێ لە بيری نەکەين کە هەرێمی کوردستان  سەربەخۆ نييە، بۆيە بە فيڕۆدانی کات و دەرفەت لەدەستدان کاريگەری گەورەی لەسەر ئايندەی قەوارەکەی دەبێ.
 لە هەمان کاتدا دوژمن و نەيارانی هەرێمی کوردستان نەک هەر چاوەروانی دەرفەتن، بگرە  پلانی دروستکردنی دەرفەتی لە ناوبردنيشيان هەيە .
ئێستا هەرێمی کوردستان بە ناو قەيرانێکی گەورەدا تێدەپەڕێ، کەچی مخابن لايەنە سياسيەکان لە جياتی دۆزينەوەی رێگە چارە  خەريکی پيلانگێڕان و قوڵکردنەوەی قەيرانەکەن!
تو بڵێی رێگە چارەيەک نەبێ؟
بێگومان  چەندين رێگە هەن، بەڵام ديارە تا پارتی بەو ميتۆدە سياسيە بجولێتەوە نەک هەر يەکێتی، بەڵکو هيچ لايەنێکی تری سياسيش ناتوانن لەگەڵيدا هەلبکەن و خۆشی بە تەنيا تۆز ناکات.
کەواتە ئێمە ئێستا پێويستمان بە دەستپێشخەری بێ مەرج هەيە، دەنا ئەگەر بەم شێوەيە بڕوا  هەلوەشانەوە و دابەش بوون بە دوور نازانرێ!

ئەم وتارە دەربڕی بۆچونی نووسەر خۆیەتی