بێگومان ئەو کەسە سەرکەوتوو دەبێت و گرەوەکە دەباتەوە، جیاوازیە سیاسیەکان، تێپەڕێنێت و لێبوردەو پشوو درێژبێت، جیاوازی سیاسی وەکو ڕوبارە نابێ بوەستێت و دەبێ بەردەوام بێت لەڕۆیشتن، هەموو کەس دەزانێت، ئەگەر ئاو بوەستێت، دەچێته چ دۆخێکی کیمیاییەوە.
مانەوەی جیاوازیە سیاسیەکان و ئەم چەقبەستوویەی ئێستا، بەهۆی دابەشنەکردن یاخود نەدانی پۆستەکانە، کە خوێندنەوەیەکی زۆر ناشیرینی بۆ کراوە لای دۆستەکانمان و بەردەوامبوونی ئەم بارودوخەش داهاتووی کوردستانی بەرەو نادیار بردووەو پێمان دەڵێ ئەگەر ئەم بارودۆخە بەردەوام بێت، مەترسیەکە، پێش ئەوەی بگاتە سەر قەوارەی هەرێم، دەگاتە سەر سەروەت و سامانی هێزە سیاسیەکانی کوردستان. لەهەر بارودۆخێکدا، خەڵك ناچارە لەسەر ماڵ و حاڵی خۆی بمێنێتەوە، بەڵام ئێوە چی لەم هەموو باڵەخانەو کارگەو ئوتێل و مۆتێلەکانتان دەکەن؟؟؟
تێپەڕاندنی جیاوازییە سیاسییەکان و پاراستنی ئاسایشی هەرێمی کوردستان، بابەتێکی هەستیار و فرە ڕەهەندە، کە پێویستی بەدیدگایەکی نیشتمانیی بەرپرسیارانە هەیە، ئەمە کۆمەڵێك پێشنیازە لەسەر بنەمای لۆژیکی سیاسی و ئەزموونی وڵاتانی سەرکەوتوو، پێویستە پارتی و یەکێتیی، گفتوگۆی ڕاستەقینە بکەن، نەك تەنیا بۆ دابەشکردنی دەسەڵات، بەڵکو بۆ داڕشتنی "گرێبەستێکی نیشتمانیی" کە تیایدا بەرژەوەندی باڵای گەل لەسەرووی بەرژەوەندی حزبییەوە بێت.
دەبێت بڕیارەکان لەڕێگەی دامەزراوەکانەوە (پەرلەمان، حکومەت، دادگاکان) بدرێن، نەك لە پشت پەردەی حزبییەوە، دامەزراوەکان سەنگی مەحەکن لای دۆستەکانمان، پێویستە متمانە لە نێوان لایەنەکان و لە نێوان خەڵك و دەسەڵاتدا دروست بکرێتەوە، زۆری جیاوازیەکان لەنێوان خەڵك و دەسەڵات، سەری هەموو هێزە سیاسیەکان دەخوات.
کارکردن لەسەر هۆشیارکردنەوەی کۆمەڵگە، بۆ قبوڵکردنی یەکتر، جیاوازی بیروبۆچوون، نابێت بە واتای بوونی دوژمنایەتی بێت، لێرەدا پێویستە میدیاو ڕوناکبیرە دڵسۆزەکان ڕۆڵی سەرەکیان هەبێت لەهێورکردنەوەی شەقامی سیاسی، پێویستیەکی ژیانیە، کە میدیاکان و کەسایەتییە سیاسییەکان دووربکەونەوە لە بەکارهێنانی زمانی تووند، چونکە زمانی تووندو زبر، هەم پەرتەوازەییەکە زیاتر دەکاو کۆمەڵگەش وێرانتر دەکات. وەکو ئەوەی زۆر باسی سوڕانی کورتانی بەرامبەرەکەی کرد، (خۆشی کورتانەکەی سوڕا)
ئاسایشی هەرێم بەندە بە یەکگرتوویی لەبابەتە ستراتیژییەکاندا، (وەک پەیوەندی لەگەڵ بەغدادو وڵاتانی دراوسێ) سەردەمانێك کە کوردستان بە یەك دەنگ قسەی دەکرد، توانای بەرگری و دانوستاندنی بەهێزتربوو لەگەڵ بەغداد، لەڕووی ئابووری، کە بڕبڕەی بەهێزی و تۆکمەیی ئاسایشەکەشی بوو. هەمەجۆرکردنی سەرچاوەکانی داهات، کەمکردنەوەی پشتبەستن بە تاکە سەرچاوەو نەهێشتنی گەندەڵی، هەرێم لەگوشارە دەرەکییەکان دەپارێزێت.
• پەیوەندی هاوسەنگ لەگەڵ دراوسێکان و کۆمەڵگەی نێودەوڵەتی: بەکارهێنانی سیاسەتی "نەرمی ستراتیژی" لەگەڵ وڵاتانی دەوروبەر و پاراستنی دۆستایەتی لەگەڵ کۆمەڵگەی نێودەوڵەتی، وا دەکات هەرێم نەبێتە گۆڕەپانی ململانێی نێودەوڵەتی.
ئارامی ڕاستەقینە لە ناخەوە دەست پێدەکات، کاتێك هاوڵاتی هەست بە دادپەروەری، یەکسانی لە هەلی کارو بوونی خزمەتگوزاری بکات، خۆی دەبێتە قەڵغانی بەرگری لە وڵاتەکەی و لەدەسەڵاتەکەی، بەهێزکردنی سەروەری یاسا و ئازادی ڕادەربڕین، وێنەیەکی شارستانی لە هەرێمی کوردستان پێشکەش دەکات کە وادەکات جیهان زیاتر بەگرنگییەوە لە ئاسایشی هەرێم بڕوانێت، ئێمە لەناوچەیەکی گڕکانی سیاسی و سەربازی دەژین، بۆیە ئارامییەکەی پێویستی بە دیپلۆماسییەکی زیرەکانەو تەباییەکی پتەو هەیە.
لەڕووی تیۆری و کردەییەوە، باشترین سیناریۆ ئەوەیە، کە "هاوبەشی" لە دەستپێشخەرییەکدا هەبێت.
• سەرۆك بارزانی وەك سەرکردەیەك کە خاوەن ئەزموون و پێگەیەکی مێژووییە، دەستپێشخەرییەك بکات، کە شەرعییەتی نیشتمانی و مێژوویی بەپڕۆژەی ئاشتبوونەوە بدات و وەك چەترێك بۆ هەموو لایەنەکان دەربکەوێت.
سەرۆك بافڵ تاڵەبانی.یش وەك سەرۆکی هێزێکی سەرەکی و خاوەن دیدگایەکی نوێ، وزەیەکی نوێ و گۆڕانکاری" بەپڕۆژەی هەستانەوەی هەرێم ببەخشێت و وا نیشان بدات، کە نەوەی نوێی سەرکردایەتی، بۆ قۆناغێکی جیاواز ئامادەیە.
ئەگەر ئەم دوو سەرکردەیە بە هاوبەشی و بە ڕاگەیەندراوێکی هاوبەش دەستپێشخەرییەکە ڕابگەیەنن، ئەوا نیوەی زیاتری ڕێگاکەمان بڕیووەو کوردستانیش بووژاوەتەوە، هەموو خەڵکی کوردستانیش لەژێر ئەم چەترەدا کۆدەبنەوە.
ئەم وتارە دەربڕی بۆچونی نووسەر خۆیەتی