شارپرێس:
بەڕێوەبەرایەتی ئاسایشی هەولێر ڕونکردنەوە لەبارەی دەستگیرکردنی کچە مۆدێلێک دەدات و دەڵێت، ڤیدیۆیەکی بەمەبەستی ریکلامی بازرگانی بڵاوکردوەتەوە و ئەو ڤیدیۆیەش ناڕەزایەتی خەڵک و ڕای گشتی لێکەوتوەتەوە.

ئاسایشی هەولێر لەڕونکردنەوەیەکدا ئاماژەی بەوەکرد،" بەفەرمانی دادوەری لێکۆڵینەوەی ئاسایشی هەولێر و بە هەماهەنگی لەگەل قایمەقامێتی قەزای ناوەندی هەولێر، تۆمەتباری ئافرەت بەناوی ( س ، د ، م)مان دەستگیرکرد، کە هەڵساوە بەبڵاوکردنەوەی گرتە ڤێدیۆیەک لە تۆڕەکۆمەڵایەتیەکان بەمەبەستی ریکلامی بازرگانی بۆ وێستگەیەکی بەنزین لەشاری هەولێر ".

ئەوەشیخستەڕوو، ئەو ژنە بەپێی ماددەی دوەمی یاسای  ژمارە 6 ی ساڵی 2008ی تایبەت بە خراپ بەکارهێنانی ئامێرەکانی پەیوەندی دەستگیرکراوە، چونکە بڵاوکردنەوەی ئەو گرتە ڤیدیۆییە ناڕەزایەتی هاوڵاتیان و ڕای گشتی لێکەوتەوە.

ئاسایشی هەولێر باسی لەوەشکرد، هەر بەهۆی ئەو ڤیدیۆیەوە ڕێکاری یاسای بەرامبەر بەنزیخانەکەش گیرایەبەر و داخرا.

دەستگیرکردنی ئەو کچە مۆدێلە پەیوەندی بە ڕوداوێکی کوشتن لە بەنزیخانەیەکی شاری هەولێر هەبوە، کە تێیدا سێ کەس کوژران.

محەمەد سەردار