شارپرێس:
تیمی پارێزەرانی لاهور شێخ جەنگی په‌یامێك بڵاوده‌كاته‌وه‌و داوای گواستنەوەی دۆسیەکەی ده‌كات له‌هه‌رێمه‌وه بۆ دادگای بەغدا.
ئەحمەد خەسرەو ئەندامی تیمی پارێزەرانی لاهور شێخ جەنگی سه‌رۆکی دەستگیرکراوی بەره‌ی گەل ڕایگەیاند، "داوامان لەدادگای فیدراڵی عێراق کردوە دۆسیەی لاهور شێخ جەنگی بگوازێتەوە بۆ بەغداو لەوێ دادگایی بکرێت".
ئەندامەکەی تیمی پارێزەرانی لاهور شێخ جەنگی باسی لەوەشکردوە، "تیمێکی پارێزەرانیان؛ لەبەغداش پێکهێناوەو داوایانکردوە دۆسیەکەی بگوازرێتەوەو پێیانوایە دادگای فیدراڵیش بەگوێره‌ى یاسا داواکە قبوڵدەکات، چونكه دادگای فیدراڵی وەک بەرزترین دادگای وڵات دەتوانێت داوا لەدادگای پارێزگاکان بکات دۆسیەکە بگوازنەوە بۆ هەر شارێکی تر کە بڕیاری لێبدات".
ئه‌وه‌شى وت:"بەهیواین لەدادگاییەکی عادیلانەدا ئەو تۆمەتانە پوچه‌ڵبكرێنه‌وه کە ئاراستەی لاهور شێخ جەنگی کراون".
دادگاى سلێمانى به‌تۆمه‌تى كوده‌تاو هه‌وڵدان بۆ كوشتنى سه‌رۆكى یه‌كێتیى نیشتمانى كوردستان‌و دروستكردنى پشێویى ئه‌منیى له‌سلێمانى، فه‌رمانى ده‌ستگیركردنى بۆ لاهور شێخ جه‌نگى ده‌ركردوه‌و بڕیاره له‌سه‌ر ئه‌و كه‌یسه دادگایى بكرێت.
