شارپرێس:
وەزارەتی تەندروستی حکومەتی هەرێم تۆماركردنى حاڵه‌تێكى دیكه‌ى تاى خوێنبه‌ربونى له‌پارێزگاى دهۆك ڕاگه‌یاند، ده‌ڵێت:"توشبوه‌كه گۆشتفرۆشه".
وه‌زاره‌تى ته‌ندروستى حكومه‌تى هه‌رێم له‌ڕاگه‌یه‌نراوێكدا ئاشكرایكردوه، "حاڵەتێکی دیکە بەنەخۆشی تای خوێنبەربون لەهەرێمی کوردستان تۆمارکرا، ئەویش پیاوێکی دانیشتوی شاری سیمێله‌و تەمەنه (43) ساڵ پیشەی قەساب".
ئه‌وه‌ش ڕونكراوه‌ته‌وه، ئه‌و هاوڵاتیه بەرکەوتەی ئاژەڵی توشبوو بوە، دوای سەردانی نەخۆشخانەو گومانلێکردن بەنەخۆشی تای خوێنبەربون‌و بونی نیشانەکانی، چەندین ڕێکاری دەستنیشانکردن‌و چارەسەری پزیشکی گیراوەتەبەر.
وه‌زاره‌تى ته‌ندروستى ده‌ڵێت:"لەئێستادا لەژێر چاودێری پزیشکی لەنەخۆشخانە خەوێندراوەو چارەسەر وەردەگرێت‌و تائێستا باری تەندروستی جێگیرە".
ته‌ندروستى داوا لەهاوڵاتیان ده‌كات، "جەختدەکەینەوە لەسەر جێبەجێکردنی ڕێنماییەکانی وەزارەتی تەندروستی، لەکاتی بونی گومان‌و نیشانەکانی نەخۆشی لەسەر ئاژەڵ پێویستە تیمەکانی ڤێترنەری ئاگاداربکەنەوە یان هاوڵاتیانی بەرکەوتوانی بەخێوکردنی ئاژەڵ یان بەرهەمەکانی ئاژەڵ، لەکاتی بونی هەر نیشانەیەکی ناتەندروست، بەخێرایی سەردانی نەخۆشخانەکان بکەن بێ دواکەوتن".
ئاشكراشیكردوه، "تائێستا دوای بونی چەندین حاڵەتی گومانلێکراوی نەخۆشی تای خوێنبەربون لەهەرێم‌و هاتنیان بۆ نەخۆشخانەو بەدواداچون‌و پشکنین بۆ گومانلێکراوانی ئەمساڵدا لەماوەی ڕابردوو، دەرەنجام تەنها نۆ حاڵەت دەسنیشانکراون‌و پشتڕاستکراوەتەوە کە بەداخەوە دوو حاڵەت لەبەر قورسی باری تەندروستیان گیانیانلەدەستداو حاڵەتەکانی دیکە بەتەواوی چاکبونەتەوەو نەخۆشخانەیان به‌جێهێشتوه".
