شارپرێس:

دادگای تێهەڵچونەوەی دادگای سلێمانی نوسراوێکی فەرمی ئاراستەی په‌رله‌مانى عێراق کردوەو داوای ئامادەبونی سروە عەبدولواحید سەرۆکی فراکسیۆنی نەوەی نوێ دەکات لەدادگا.

بەگوێرەی نوسراوێكى دادگای تێهەڵچونەوەی ناوچەی سلێمانی كە لەمانگی تەمموزی ئەمساڵ دەرچوەو ئاراستەی په‌رله‌مانى عێراق كراوە ئاماژەى بەكردنەوەی پەڕاوی لێكۆڵینەوە كردوه‌ سەبارەت بەسروە عەبدولواحید پەرلەمانتاری جوڵانەوەی نەوەی نوێ بەتۆمەتی تۆمەتهەڵبەستن.

لەنوسراوەكەى دادگاى سلێمانیدا ئاماژە بەڕۆژی دادبینی كراوە كە پێویستە ناوبراو لە23ی 12ی 2025، لەبەردەم دادگا ئامادە بێت بۆ وەرگرتنی وتەكانی.

ئەو مادە یاساییەی كە دۆسیەی لەدژی پەرلەمانتار سروە عەبدولواحیدی پێكراوەتەوە، مادە 433ی یاسای سزادانی عێراقیە كە باس لەتاوانی تۆمەتهەڵبەستن بەناڕەوا دەكات بەشێوەیەكی ئاشكرا بۆ ڕای گشتیی، بەبێ بونی بەڵگەیەكی ڕاست‌و دروست، ئه‌وه‌ش زیانی دەرونی‌و مەعنەوی بەكەسی تۆمەت بۆهەڵبەستراو دەگەیه‌نێت‌و سزاكەی گرتن‌و پێبژاردن یاخود یەكێك لەو دوو جۆرە سزایەیە.