هەمیشە کاتێ داگیرکەرانی کورد لە هەر باروزروف و سەردەمێک ، هەستیان بە جۆرێک لە ترسی ئیقلیمی یان دەولی کردبێت ، پەنایان بۆ گفتوگۆ لەگەڵ کورد یان بە جۆرێکی تر چارەسەری کێشەی کورد بردوە ، لە زۆربەی زۆری ئەو گفتوگۆیانەشدا ، هەمیشە لایەنی کورد بە دۆڕاوی لێی دەرچوە ، ئەمەش دوو عیلەتی هەبوە وە هەتا ئێستەش هەیەتی ،
یەکەم ،
کورد برواو متمانەی بە دەسەڵاتدارانی داگیرکەر نەبوە کە بەراستی نیەتی چارەسەرکردنی کێشەی کوردیان هەبێ ، هەرچەندە کورد بەلایەنی کەمی چارەسەرەکانیش هەر رازی بوون ، بەڵام لایەنی داگیرکەر راوحی بە کورد کردوە ، تا تەمو مژی ئەو ترسە ئیقلیمی و دەوڵیەبەلایەکدا بکەوێ ، لەبنەرەتدا بروای پێ نەبوە
دوەم،
کورد لەبەر ئەوەی هەمیشە پەنای بۆ شاخ و چەک بردوە جۆرێک لە شۆرشی ئاراستە کردوە بۆ فشار خستنە سەر داگیرکەر ، بۆیە لە سیاسەت و هونەری گفتوگۆدا پیاوی شارەزاو فێڵبازو لەولەبان و بیرتیژی نەبوە تا بتوانێ ئەمیش راوح بەلایەنی داگیرکەر بکات .
ئەم خەسڵەتە وا رۆشت هەتا دەرکەوتنی سیاسەتمەدارێکی لاوی تێگەیشتوی وەک سەلاحەدین دەمیرتاش و و هاورێکانی لە پارتی هەدەپە ، دروست کردنی مۆدیلێکی زۆر تازەو عەسری و نوێ لە خەباتی گەلی کورد بۆ دەستەبەر کردنی ماف و ئازادی کۆمەڵانی خەڵکی کوردستان ، دەمیرتاش و هاورێکانی هەر زوو کارتی گفتوگۆی چارەسەخوازیان فرێدایە سەر مێزی حکومەتی ئەردۆگان ، ئەوە بوو تارادەیەک کاری ئەرێنی خۆی کرد لە کاتی خۆیدا ، وەلی بۆ بە ئەنجام نەگەیشت و دەمیرتاش و هاورێکانی بۆ کەوتنە گۆشەی زیندان ؟
بە کورتی خواستەکانی دەمیرتاش و هاوڕێکانی و هەدەپە
یەکەم ،
گوێزانەوەی میتۆدی خەبات بۆ رزگاری گەلی کوردو ناوچەکە لە شاخەوە بۆ سەر شەقامەکانی شار ، ئەمەش دوو ئامانجی هەبوو ، ١ لابردن و رەواندنەوەی تەمو مژی بە تیرۆرست ناساندنی مقاوەمەی کورد دژی داگیرکەر ، ٢ گوێزانەوەی مەسەلەی کورد لە خواست و جەنگ و ململانێێ ئاگرینی چەک بۆ سیاسەت کردن و خۆپیشاندان و خەباتی پەرلەمانی و مەدەنی ، کە هەموو ئەمانەی زۆر بە سیاسیانەو بەرپرسیارانەو ئازایانە پیشانی جیهان دا ،
دوەم
هەدەپەو دەمیرتاش و هاورێکانی ، دەنگی کوردیان گێرایەوە بۆ کوردستان ئەوە بوو لە لەسەدا ١٣ دەنگی کوردیان بەدەست هێنا ، ئەمەش تورکی توشی شۆک کردوو ئەنجامی هەڵبژاردنیان قوبوڵ نەکرد ، لە دوبارەبونەوەش بە هەزار غەدر هێشتا لەسەدا ١٠ بەدەست هات . ئەمە واتە بە کردەوە کێشەی کورد قۆناغی شاخی گواستۆتەوە بۆ شەقامەکانی شار . لەم رێگەیەوە بەشی زۆری سەرۆک شارەوانیەکانی بۆ کورد گێرایەوە
سێەم
بەهێز بوونی لایەنی کوردی لەسەر مێزی گفتوگۆ ، کە دەمیرتاش و هاورێکانی بە ئاشکرا کورد واتەنی کونە مشکیان لە لایەنی دەسەڵاتدارانی تورک کردبوو بە قەیسەری
چوارەم
پێشوازی جیهان لەو خەباتە نوێخوازو عەسریەی کورد بۆ چارەسەری کێشەی کورد ، ئەمەش هەم ئەردۆگان هەم دەسەڵاتدارانی داگیرکەرانی چوارپارچەی کوردستانی توشی هێستریا کردبوو
بۆ شکاندنی ئەم رەوشە تورکیاو ئێران و سوریاو عیراق بەردەوام لەگەڵ یەک لەسەر مێزو لە ژێر مێز لەهەوڵدا بوون ، هەروەک دەوترێ داگیرکەرانی کورد تەنها بۆ شکاندنی قەزیەیی کورد رێک و تەبان ، ئەمەش بە ئاشکرا پارتی دیموکراتی کوردستانی باشورو خودی مەسعود بارزانیان بەکار هێا ، بینرا چۆن لەگەڵ ئەردۆگان بانگەشەیان بۆ ئاک پارتی دەکرد دژی هەدەپەو خواستی کورد ، تەسلیم بونەوەی شڤان پەروەر پاش چەل ساڵ لە سرودی بژی پێشمەرگە دەستیان لەدەستی ئەردۆگان دژی خواستی کورد ، پەلاماردانی رۆژئاوای کوردستان و هەوڵدان بۆ گرێدانیان بە تیرۆرو بە پەکەکەوە .
لێرەوە رۆڵی پەکەکە
پەکەکە رێکخراوێکی کوردی شەرکەری شۆرشگێر و هەڵقوڵاوی ئێشو ئازارەکانی کوردستان ، هەر لە دروست بونیەوە جێگەی هەم ترس و دڵەراوکێی داگیرکەران بوە هەم هێزێکی حساب بۆ کراوی ناوچەیی بوە ، بە سەر چەند سەردەم و هەورازو نشێوو ، چەند سەرکەوتن و نوشوستدا تێپەریوە ، بەڵام توانیویەتی خۆی رێک بخاتەوە و ببێتەوە بەو هێزەی داگیرکەر بتۆقێنێت ، پەکەکە بەشێکی گەورە لە مێژوی رزگاری کوردستان دروست دەکاو دروستی کردوە لێرەدا ناتوانین باسی خەسڵەت و جوامێری و خەباتی پەکەکە بکەین ، ئەمما بۆچی پەکەکە نەیتوانی هاوکار بێت لەو شۆرشە مەدەنیەی هەدەپەو دەمیرتاش و هاورێکانی گرتیانە بەر ، بە مەدەنی کردنی یان گوێزانەوەی خەباتی کورد لە شاخەوە بۆ شار ؟ ئەمە بەڕای من دوو لایەنەیە
لایەنی داگیرکەر هەمیشە حەز دەکات هێزێکی شاخاوی و دوورەپەرێز لە شارو چەکدار نوێنەرایەتی قەزیەی کورد بکات ، تا ئەو بتوانێ درۆو سیاسەتی چەواشەکاری خۆی پیا هەڵواسێ ، خۆ ئەگەر پەکەکەش لەشاخ یان لە قەندیل نەمێنن ، ئەوا ئەوان لە جاش و ئەعوانەکانی خۆیان پەکەکەیەکی ساختە دروست دەکەن و دەینێرنە قەندیل ، تا شەری پێ بفرۆشن و ئاژاوە لە ناوچەکە بنێنەوە ، لایەنی کورد و پەکەکەش باش ئەو هەموو ساڵە لە خەباتی چەک ، ئەمیش کوردانە ئامادە نیە مەلەفی کورد بداتە دەستی کۆمەڵێ سیاسی گەنجی خوێنگەرمی شاری و هەر حەز دەکەن خۆیان قسەکەرو بریاردەری چاک و خراپی قەزیەی کورد بن ، ئەمان بریار بدەن شەر یان ئاشتی
لەم بەنەدا زۆر وردەکاری هەن جێگەی باسکردنیان نیە
بۆیە دانوستان و گفتوگۆی حکومەتی ئەردۆگان یا غەیری ئەردۆگان بۆ کێسەی کورد ، بە دەستپێشخەری دەبێت کە تەواوی زیندانیە سیاسیە کوردەکان بە سەرکردەیی دەمیرتاش ئازاد بکرێن و ، ئازادیش بۆ سومبولی خەباتی کوردستان ئۆجالان فەراهەم بکرێت ، تا لە سەر سفرەی پڕ نیەتی پاک دانوستان بکرێت غەیری ئەمە تەنها چاوشارکێەو بەس .
ئەم وتارە دەربڕی بۆچونی نووسەر خۆیەتی