لەدوو دیداری جیاوازدا هەریەك لە مەزڵوم عەبدی و ساڵح موسلیم گفت و گۆیان لە سەر بارو دۆخی ڕێكەوتن و دان وستان و ئاشتی لە گەڵ دیمەشق كرد ، كۆی قسەكان زۆر وردو حسابی بون ، لە ڕاستیدا من بۆ خۆم یەكەمجارە دەبینم كورد زۆر ئاوەزیانە مامەڵە لە گەڵ بارو دۆخ دەكات ، من نامەوێت وتەكانی ئەوان لێرە دابنەمەوە ، بەڵام ئەوەی گرنگە ئەوان هەردووك لە سەر ئەوە كۆك بوون كە دەبێت واقیعی ڕۆژئاوای كوردستان لە بەر چاو بگیرێت و گفت و گۆ لە كەشی دیموكراسی و هاوسەنگیدا بكرێت و هەموو شتێك باس بكرێت ، دیبلۆماسیانە قسە كردن بریتیە لەوەی كە چۆن بتوانی هەم ئامادەیی خۆت نیشان بدەیت ، هەم نەتەوەێ هیچ لە دەست بدەیت ، هەروەها كێماسی و كەم و كوڕیش بەو جۆرە وێنا بكەی كە ئەوی بەرانبەر نایەتە پێشەوە .
ڕۆژئاوای كوردستان تەنها شوێنە لە سوریا بۆنی خۆبەڕێوەبەری دیموكراسی و پێكەوە ژیانی ئاشتیانەی لێدێت ، ئەوە جگە لەوەی پەروەردەیەكیە سیاسی گشتی ئەوتۆش هەیە، كە هەر كەس هەست بە خۆخاوەنی خۆی بكات ، لێرەدا وێڕای ئەو هەموو تەنگ و چەڵەمەو ئاڕیشەیەی بۆ رۆژئاوا دروست دەكرێت ئەو بەردەوام لە گەشە كردندایە، ئەمەش خاڵێكی گرنگە بۆ ئەوەی هەموو ئەوانەی چاودێری ڕەوشی سوریا دەكەن ، نمونەی ڕۆژئاوا بگشتێنن، نەك بە پێچەوانەوە ڕۆژئاوا بخەنە بەردەم بارو دۆخی ئەوەی دیمەشقێكی پڕ لە كێشەو ئاڵۆزی قەبوڵبكات ، هەر یەك لە ساڵح موسلیم و عەبدی زۆر ڕوون وتیان ناكرێت هێزی كوردی بدرێتە دەست ڕەشەبای چارەنوسی نادیارەوە ، هەڵبەت زیاتر لە سەت هەزار چەكداری پەروەردەكراویش ناكرێت بە شێوازی تێكەڵكردنی مێگەلیانە تێكەڵ بە سوپای سوری بكرێت ، كە بە قسەی ئەمەریكی و فەڕەنسی و خەڵكی تریش سوپایەكی ناجۆرو بێسەرو بەرەیە، ئەوەی لە سوەیداش ڕوویدا زیاتر ئەو ڕاستیەی دەرخست .
ئەوەی ئێستا لە ڕۆژئاوای كوردستان هەیە بە هەموو مانایەك ، دەوڵەتە دەوڵەتێكی دانپیانەنراو ، ئێ ناكرێت ئەم دام و دەزگاو دەوڵەتە بێلێكدانەوەو لە هیچە ڕادەستی هەتەشەو دیمەشق بكرێت ، بۆیە دەبێت هەموو ئەوانەی دەیانەوێت ڕۆژئاوا بەشێك بێت لە گفت و گۆ لە گەڵ دیمەشق ئەو ڕاستیە بزانن و ڕۆژئاوا خۆیشیان لە كەمتر لە فیدراڵی ڕازی نەبن ، هەڵبەت دەبێت ئەو ڕاستیەش بزانین كە ڕۆژئاوا زۆر ئاوەزیانەو ستراتیژیانە هەنگاو دەنەن ، ئەمەش نیشانەی ئەوەیە كە ئەمان لە دۆخی بەهێزتردان لەوانی بەرانبەر كە زۆربەی جارو بۆ هەرهەنگاوێك دەبێت بگەڕێنەوە بۆ خەڵكی تر ، هەروەك دەستوەردانە ڕاستەوخۆكانی توركیا و وتەو لێدوانی بەرپرسانی توركیا لە كاتی دان وستاندا كە هەمووی وەك دەستوەردان دەبینرێت .
خۆ بەڕێوەبەری ڕۆژئاوا نمونەیەكی هەرە دیموكراسیانەی ناوچەكەیە، بۆیە كاتێك قسە لە لامەركەزی دەكرێت ناناوەندێتی وەك ئەوەی ناكرێت باشێك ڕادەستی خراپێك بكرێت ، خراپێك كە نازانی و دیار نیە داخوا خراپتر دەبێت یان نا، ئەوەی لە دان وستانی ئاشتیدا گرنگە ئەوەیە دۆخ بەرەو خراپتر نەبرێت ، هەروەها وەك ساڵح موسلیم گوتی قسە لە سەر هەموو شتێك بكرێت ، چونكە هێشتا قسە لە سەر زۆر شت نەكراوە ، ڕۆژئاوای كوردستان دەسكەوتێكی گرنگی ناوچەكەیە ، دەبێت ئەوە بزانین كە هەموو ئەو وڵاتانەی ناوچەكە كە ناتوانن دیموكراسی بن چاویان بەم ئیدارەخۆسەریەدا هەڵنایەت ، بۆیە چاودێرو ناوبژیكارانی دانیشتنەكان ناكرێت لایەنی فشار بن بۆ سەر لایەنە باشەكە ، لە كاتێكا ڕوداوەكانی سوەیدا پێمان دەڵێن لە ئاوەزی حوكمڕانی سوریدا كێشەیەكی گەورە هەیە .
ئەم وتارە دەربڕی بۆچونی نووسەر خۆیەتی