شارپرێس: 
هەفتەی ڕابردوو، تید لیوی ئەندامی کۆنگرێسی دیموکراتەکان، مارکۆ ڕۆبیۆی وەزیری دەرەوەی ئەمریکای بە پرسیارێکی ڕاستەوخۆ و کتوپڕ سەرسام کرد؛ ئەو پرسیاری لێکرد ئایا دەتوانێت پشتڕاستی بکاتەوە کە سەرۆک ترامپ لە کاتی کۆبوونەوەی ژوورە داخراوەکاندا، دوور لە چاوی کامێراکان، تووشی خەو لێکەوتنی کتوپڕ نابێت؟.

 
ئەم پرسیارە لە کاتی پێشکەشکردنی زانیاریی پێدانی ڕۆبیۆ بوو سەبارەت بە جەنگی ئێران و سیاسەتە دەرەکییەکانی ئیدارەی دۆناڵد ترامپ.

ڕۆبیۆ بە توندی وەڵامی دایەوە و بابەتەکەی بە تەواوی ڕەت کردەوە و جەختی لەوە کردەوە کە سەرۆک ترامپ زۆر کەم دەخەوێت، تەنانەت ئاماژەی بەوەش کرد کە خۆی بە زەحمەت دەتوانێت لەگەڵیدا ڕابێت؛ چونکە سەرۆک لە درەنگانی شەو یان بەرەبەیانی زۆر زوودا پەیوەندی پێوە دەکات و داواکاری لێ دەکات.

ڕۆبیۆ وتی: "من دەمەوێت 6 کاتژمێر بخەوم، بەڵام سەرۆک زۆر کەم دەخەوێت و ئەمەش لە گەشتە دەرەکییەکانیشدا بەردەوامە."

لە بەرامبەردا، لیوی پەرلەمانتار گرتەیەکی ڤیدیۆیی نیشانی وەزیر دا، کە تێیدا ترامپ لە کاتی کۆبوونەوەیەکی حکومەتدا دەردەکەوێت کە بە زەحمەت چاوەکانی دەکاتەوە و خەو دەیباتەوە؛ ئەمەش ڕێک لەو کاتەدا بوو کە ڕۆبیۆ لەبەردەم سەرۆکدا باسی بژاردەکانی جەنگ و ئاشتی لەگەڵ ئێرانی دەکرد. لە کۆتاییدا، پەرلەمانتارەکە وەزیری تۆمەتبار کرد بەوەی لەژێر سوێنددا ڕاستییەکەی نەوتووە.

تەنها چەند کاتژمێرێک دوای ئەم مشتومڕە، ترامپ جارێکی تر لە کاتی پێشوازیکردنی شاندێکی ئابووری لە نووسینگەی کۆشکی سپی، لەسەر کورسییەکەی خەوی لێکەوتەوە.
ئەم خەوتنە بەردەوامانە بۆتە مایەی نیگەرانی پەیامنێران، ئەندامانی کۆنگرێس و تەنانەت هەندێک لە کۆمارییەکانیش. کۆشکی سپی و بەرپرسانی وەک پیت هیگسێس لە پێنتاگۆن، بەردەوام ئەم هەواڵانە ڕەت دەکەنەوە.

ئەم بابەتە کاتێک دەبێتە جێی بایەخ کە ترامپ لە ماوەی 1.5 ساڵی یەکەمی سەرۆکایەتییەکەیدا، بەردەوام جۆ بایدنی بە "جۆی خەواڵوو" ناو دەبرد و ڕەخنەی لە توانای جەستەیی و هۆشەکیی ئەو دەگرت.
ئێستا کە ترامپ لە سەرەتای مانگی تەممووزدا دەبێتە 80 ساڵ، پرسیاری زۆر لەسەر باری تەندرووستیی و ئەو کەمخەوییە درووست بووە کە ڕەنگە کار بکاتە سەر بڕیارە گرنگەکانی وڵات.
هەرچەندە پزیشکانی کۆشکی سپی دەڵێن تەندرووستیی باشە، بەڵام دەرکەوتنی نیشانەی وەک پەڵە لەسەر دەستەکانی و ئاوسانی قاچەکانی، هێشتا وەک مەتەڵێک بۆ ڕای گشتیی ماوەتەوە.