شارپرێس:
پێگەی "زە نیو ڕیجن"ی ئەمریکی ئاشکرای کردووە کە عێراق بە نهێنیی نێوەندگیریى دەکات بۆ گەڕاندنەوەی پەیوەندییەکان لە نێوان ئێران و حکومەتی کاتیی سووریا، کە پاش ڕووخانی ڕژێمی بەشار ئەسەد، پچڕاون.

 
پێگەکە لە زارى بەرپرسانی عێراقەوە گواستوویەتییەوە کە بەغدا کار بۆ چاککردنەوەی پەیوەندییەکانی نێوان تاران و دیمەشق و تێپەڕاندنی دۆخی "ساردی ستراتیژی" لە نێوانیاندا دەکات، بە سوود وەرگرتن لە پێگەی جوگرافی خۆی و پەیوەندییە پتەوەکانی لەگەڵ ئێران.

سەرچاوە سیاسییەکان ئاماژەیان بەوەداوە کە شاندێکی عێراقی کە بەرپرسانی هەواڵگری و دەرەوەیان تێدابووە، بە نهێنی سەردانی دیمەشقیان کردووە و لەگەڵ بەرپرسانی باڵای سووریا کۆبوونەتەوە، بۆ تاوتوێکردنی کردنەوەی کەناڵەکانی پەیوەندی نوێ لەگەڵ تاران.

بەپێی پێگەکە، ئێران داوای لە عێراق کردووە ڕۆڵی نێوەندگیر ببینێت بۆ دەستپێکردنەوەی دانوستانەکان و گەرەنتی کردنی بەرژەوەندییە ئابووری و سەربازییەکانی، لە کاتێکدا بەغدا پێشنیازی هاوکاریی ئابووری و ئەمنی قۆناغ بە قۆناغ دەکات لە بەرامبەر کەمکردنەوەی دەستێوەردانی ڕاستەوخۆی ئێران لە سووریا.

ئاکۆ عەبدوڵڵا ئاڵی