شارپرێس:
سەرچاوەکانی چوارچێوەی هەماهەنگی ئاشکرایان کردووە کە بەشێوەیەکی رانەگەیەندراو گفتوگۆ لەسەر گۆڕینی نوری مالیکی بەکەسایەتییەکی پەسەند یان کاندیدی سازان دەکرێت، بەمەرجێک ئەو کەسە تەنیا لەلایەن خودی مالیکییەوە دیاری بکرێت و پشتگیری بکرێت.

 
بەگوێرەی هەواڵێکی پێگەی تۆڕی هەواڵی عێراقی (INN)،  لە پشت پەردەی کۆبوونەوەکاندا چەند ناوێک دەخرێنە ڕوو کە نزیکن لە ئێران، هەروەها ئەگەری دووبارەبوونەوەی سیناریۆکەی پێشوو و کاندیدکردنی حەیدەر عەبادی وەک بژاردەیەکی ناوەندگیر لە ئارادایە بۆ دەربازبوون لە چەقبەستوویی سیاسی و دوورکەوتنەوە لە لێکەوتە نەخوازراوەکان.

ئەوەش هاتووە: ئەم هەوڵانە لەکاتێکدایە کە وەزارەتی دەرەوەی ئەمریکا هەڵوێستێکی توندی نیشانداوە و جەختی کردۆتەوە کە ئیدارەکەی دۆناڵد ترەمپ هەموو ئامرازەکان بەکاردێنێت بۆ ڕێگریکردن لە گەیشتنی مالیکی بە پۆستی سەرۆک وەزیران و جێبەجێکردنی دیدگای واشنتۆن لە عێراق.