شارپرێس:

سەرباری ئەوەی دژەتیرۆری هەرێمی کوردستان ئێران بەئەنجامدانی هێرشەکەی شەوی رابردوی سەر گوندی زەرگەزەوی سنوری پارێزگای هەولێر و شەهیدبونی دوو هاوسەرەکە تۆمەتبارکرد، کونسوڵخانەی ئێران لەهەولێر راگەیەنراوێکی لەبارەی هێرشەکە بڵاوکردەوە و روداوەکە شەرمەزار دەکات.

کونسوڵخانەی ئێران لەهەولێر لەڕاگەیەنراوێکدا دەڵێت ،" هەواڵی شەهیدبوونی ژمارەیەک هاوڵاتی بێتاوان لە هەرێمی کوردستان، خەم و پەشیمانییەکی زۆری بەدوای خۆیدا هێنا ".

ئەوەشیخستەڕوو، کونسوڵخانەی گشتی کۆماری ئیسلامی ئێران لە هەولێر وێڕای دەربڕینی هاوخەمی خۆی بۆ کەسوکاری شەهیدان و خەڵکی بەشەرەف و حکومەتی هەرێمی کوردستان، ئەم ڕوداوە شەرمەزار دەکات و سەرەخۆشی ئاراستەی ڕزگاربوان و گەل و حکومەتی هەرێمی کوردستان دەکات.

کونسوڵخانەی ئێران باسی لەوەشکرد،" ان شاءاللە جارێکی تر ئاشتی و ئاسایش لە ناوچەکەدا حوکم دەکات و خەڵکی ناوچەکەش دەتوانن پەیوەندییە باشەکان قوڵتر بکەنەوە و لە پێکەوە ژیانی ئاشتیانەدا پەرە بە کارلێکەکانیان بدەن ".