شارپرێس:
لەگەڵ خێرا بوونی پەرەسەندنی زیرەکیی دەستکرد و گەیشتنی مۆدێلەکانی بە ئاستێکی بەرزی توانای پلان‌دانان، پرۆگرام ‌نووسین و کاریگەریکردن لەسەر مرۆڤ، نیگەرانییەکان سەبارەت بە ئەگەری دەرچوونی ئەم تەکنەلۆژییە لە ژێر کۆنترۆڵ زیاد دەبن.

هەندێک کەس دەترسن زیرەکیی دەستکرد لە ئامرازێک بۆ خزمەتکردنی مرۆڤەکانەوە بگۆڕێت بۆ هەڕەشەیەکی بوونیی بۆ مرۆڤایەتیی.

بەڵام ئایا زیرەکیی دەستکرد بەڕاستی دەتوانێت مرۆڤایەتیی لەناو ببات؟ ژمارەیەک لە زانایانی دیار کە خۆیان بەشدارییان لە دروستکردن و پەرەپێدانی ئەم تەکنەلۆژییە کردووە، پێیان وایە مەترسییەکە تەنها چیرۆکێکی زانستیی‌ خەیاڵیی نییە. لەگەڵ ئەوەشدا، لەسەر قەبارەی مەترسییەکە و کاتی ڕوودانی، هێشتا ناکۆکییەکی زۆر هەیە.

لەنێوان دەنگە ناسراوەکانی ئاگادارکردنەوە لە مەترسییەکان، یوشوا بینجیو، جێفری هینتۆن و ئەیدان گۆمێز هەن. ئەوان هەموویان ڕۆڵێکی گرنگیان لە پەرەپێدانی فێربوونی قووڵ، تۆڕە دەمارییەکان و زیرەکیی دەستکردی نوێدا هەبووە.

یوشوا بینجیو، زانای کۆمپیوتەر و مامۆستای زانکۆی مۆنتریاڵ، یەکێکە لە پێشڕەوانی سەرەکیی فێربوونی قووڵی نوێ. لە 9ی ئەیلوول، لەبارەی هۆشدارییەکانی جاکۆب کۆکسۆن، توێژەری کۆمپانیای ئەنتڕۆپیک، وتی زاناکانی ناو تاقیگە پێشتر لە خەڵک مەترسییەکانی مۆدێلە نوێکان دەبینن، بۆیە دیدگای ئەوان بۆ ئاگادارکردنەوەی کۆمەڵگا زۆر گرنگە.

بینجیو لە وتارێکی دواتردا وتی سیستەمەکانی ئێستای زیرەکیی دەستکرد توانای هێرشکردنی سایبەری و کاریگەریی دانان لەسەر بیرکردنەوەی مرۆڤیان هەیە. هەروەها، ئەم سیستەمانە دەتوانن بۆ ماوەی ڕۆژان یان هەفتان پلان دابنێن.

 ئەو نیگەرانە کە هەوڵەکانی کۆمپانیاکان بۆ چارەسەرکردنی "ناگونجانی ئامانجەکان" لەوانەیە ببێتە هۆی ئەوەی مۆدێلەکان فێری فێڵکردن بن، بەبێ ئەوەی دەستنیشان بکرێن. بۆیە پێویستە ڕێگاکانی چاودێریکردنی کردار و پرۆسەی بیرکردنەوەی ئەم سیستەمانە بەردەوام پەرە پێ بدرێن.

جێفری هینتۆن، یەکێک لە دامەزرێنەرانی تۆڕە دەمارییەکان، دەڵێت دیاریکردنی ئەگەری لەناوبردنی مرۆڤایەتیی زۆر قورسە، چونکە مرۆڤ تاکو ئێستا شتێکی هاوشێوەی ئەوەی دروست نەکردووە. لە گفتوگۆیەکی 10ی ئەیلوولدا، وتویەتی ئەگەری 10% بۆ مردنی هەموو مرۆڤەکان لە 10 ساڵی داهاتوودا نابێت بە تەواوی نامۆ بزانرێت، بەڵام هیچ کەسێک نازانێت چۆن ئەم مەترسییە بە وردی هەڵبسەنگێنێت. 

هینتۆن هۆشداری داوە کە زیرەکیی دەستکرد دەتوانێت ڤایرۆسی زیندەیی، ڤایرۆسی ئەلیکترۆنی و هێرشی سایبەریی وێرانکەر دروست بکات.

لە بەرامبەردا، ئەیدان گۆمێز زیاتر سەرنجی خستۆتە سەر مەترسیی نزیکتر، واتە بەکارهێنانی مۆدێلەکانی زیرەکیی دەستکرد بۆ هێرشە سایبەرییەکان. ئەو یەکێک بوو لە نووسەرانی توێژینەوەی بەناوبانگی «Attention Is All You Need» کە لە ساڵی 2017 بڵاوکرایەوە. گۆمێز پێی وایە ئەم مۆدێلانە بەهێزترین چەکی سایبەرییە کە مرۆڤ دروستی کردووە، چونکە دەتوانن کەلێنە ئەمنییەکان بە خێرایی بدۆزنەوە و بە شێوەیەکی فراوان بەکاریان بهێنن.

سەرەڕای جیاوازییەکانیان، ئەم 3 زانایە لەسەر خاڵێکی سەرەکیی هاوڕان: ئەو توانایانەی پێشتر بە داهاتوو دادەنران، ئێستا بە ئاستی جیاواز بوونیان هەیە. بەڵام ئەوان بەڵگەیان نییە کە لەناوچوونی مرۆڤایەتی حەتمی یان نزیکە.

 پەیامی سەرەکییان ئەوەیە کە ئامادەبوون بۆ مەترسییەکان دەبێت پێش گەیشتنی زیرەکیی دەستکرد بە ئاستێکی زۆر پێشکەوتوو دەست پێ بکات، و دڵنیابین لەوەی ئەم سیستەمانە هەمیشە لەگەڵ بەرژەوەندییەکانی مرۆڤدا هاوتەریب بن.