شارپرێس:

به‌گوێره‌ى ئه‌و زانیاریانه‌ى ڕه‌نج پشده‌ریى چالاكوانی بواری مافه‌كانى پەناخوازان ئاشكرایكردوه‌، بەلەمێكی كۆچبەران لەكەناراوەكانی یۆنان ژێرئاو كه‌وتوه‌و وتەی كۆچبەرە ڕزگاربوەكان، سێ كەس لەو ڕوداوەدا خنكاون كە ژن‌و منداڵ‌و پیاوێكن.

ئێوارەی دوێنێ هەینی، بەلەمێكی به‌ناخوازان بە 45 سەرنشینەوە لەتوركیاوە بەرەو یۆنان بەڕێكەوتوە، دوای نزیكبونەوەی لەكەناراوەكانی یۆنان، بەهۆی شەپۆلی بەهێزی دەریاوە، بەلەمەكە نقوم بوه‌.

زانیارییه‌كان باس له‌وه‌ده‌كه‌ن، سێ كەس خنكاون، ئەوانەشی ڕزگاریان بوە، بەپەلە خۆیان گەیاندوەتە دورگەیەكی شاخاویی‌و لەدۆخێكی دژواردان‌و داوای فریاگوزاریی بەپەلە دەكەن.

له‌وباره‌یه‌وه‌ ڕەنج پشدەریی چالاكوانی بواری مافی پەناخوازان لەئەوروپا له‌فه‌یسبوكى خۆى نوسیویه‌تى، "بەشێك لەپه‌ناخوازان پێیانڕاگەیاندوم كە دوای ئەوەی لەڕوداوەكە ڕزگاریان بوه‌، بەپەلە خۆیان گەیاندوەتە دورگەیەكی شاخاویی‌و داوای بەدەنگەوەهاتنی بەپەلەیان كردوە".

وه‌كو پشده‌ریى ده‌ڵێت:"په‌ناخوازه‌كان پێیان وتم، جلەكانمان تەڕبونەو كەشوهەوای دورگەكەش زۆر ساردە، چەند كەسێكمان بەهۆی ئاوی سوێرەوە نەخۆشكەوتون‌و داوای فریاگوزاریی بەپەلە دەكەین".

به‌گوێره‌ى زانیارییەكان، زۆرینەی په‌ناخوازانى نێو بەلەمەكە ئەفغانین‌و چەند كەسێكیان ئێرانین‌و كوردیشیان لەگەڵدا بوە، ئەو سێ كەسەشی لەڕوداوی ژێرئاوكه‌وتنى بەلەمەكە خنكاون، ناسنامەیان دەركەوتوە كە خەڵكی ئەفغانستانن.