شارپرێس:

مەسعود پزیشکیان سەرۆک کۆماری ئێران نیگەرانیی خۆی لەدوبەرەکی ناوخۆیی‌و تێکدانی یەکڕیزیی وڵات دەربڕیی‌و ڕایگه‌یاند، "تاران بەدوای شەڕەوە نییە لەگەڵ ئیسرائیل‌و ئەمریکا".

مەسعود پزیشکیان سەرۆک کۆماری ئێران لەچاوپێکەوتنێکی تەلەفزیۆنیدا وتى، ''ئێمە بەدوای شەڕدا ناگەڕێین، بەڵام ئەگەر ئیسرائیل‌و ئەمریکا بیانەوێت داگیرکاریی بکەن، ئەوا بەتوندى ڕوبەڕویان دەبینەوە".

سەرۆک کۆماری ئێران ئه‌وه‌شى ڕونكرده‌وه‌، "ئێمە نامانەوێت شەڕبکەین، هەر لەسەرەتاوە وامان وتوە، بەڵام لەشەڕیش ناترسین، گەلەکەمان سەلماندویەتی کە ئەگەر شەڕ هەڵگیرسێت، یەکگرتویی‌و یەکگرتویی ناوخۆییش زۆر بەهێزتر دەبێت".

مانگی حوزەیرانی ئەمساڵ ئیسرائیل هێرشی ئاسمانیی کردەسەر ئێران‌و ئێرانیش لەڕێگەی درۆن‌و موشەکی دورمەوداوە ئیسرائیلی بەئامانجگرت، لەهێرشەکەدا ئیسرائیل چەند پێگەیەک لەنێوانیاندا بنکە ئەتۆمییەکانی ئەو وڵاتەی کردە ئامانج، ئەمە جیا لەکوشتنی چەند فەرماندەیەکی باڵای ئێران لەلایەن ئیسرائیلەوە.

دواتر ئەمریکاش هاتە ناو جەنگەکەو بنکە ئەتۆمییەکانی ئێرانی بۆردومانکرد،لە کۆتاییشدا تاران‌و تەلئەبیب بەنێوەندگیریی ترەمپ ئاگربەستیان ڕاگەیاند.