شارپرێس:
ئەمڕۆ دووشەممە، 834 هاوڵاتیی عێراقی کەمپی هۆلیان لە پارێزگای حەسەکەی سووریا بەجێهێشت و بەرەو خاکی عێراق بەڕێکەوتن. ئەم پرۆسەیە لەژێر ڕێوشوێنی ئەمنیی توندی هێزەکانی هاوپەیمانیی نێودەوڵەتی بە سەرۆکایەتیی ئەمریکا بەڕێوەچووە.

 
سەرچاوەیەکی ئەمنی لە کەمپەکەوە ڕایگەیاند، ئەمە 32یەمین کاروانی گەڕانەوەیە و 824 کەس لەخۆدەگرێت کە دابەشبوون بەسەر 230 خێزاندا. ئەم گەڕانەوەیە بە هەماهەنگیی نێوان بەڕێوەبەریی خۆسەری رۆژئاوای کوردستان و حکومەتی عێراق ئەنجام دەدرێت.

سەرچاوەکە ئاماژەی بەوەش کرد کە هێشتا نزیکەی 2500 عێراقی لە کەمپەکە ماون، بەڵام دەیان خێزان هەن کە ئارەزووی گەڕانەوە ناکەن و ئەوەش بووەتە ئاڵنگاریی.

باس لەوەشکراوە کە بۆ گواستنەوەیان، زیاتر لە 20 پاس ئامادە کراون تا لە ڕێگەی دەروازەی سنووریی یەعرووبیەوە بیانگوازنەوە. کاروانەکە بە یاوەریی زرێپۆش و فڕۆکە کۆپتەرەکانی ئەمریکا دەپارێزران بۆ دڵنیابوون لە گەیشتنیان بە سەلامەتی بۆ ناو عێراق.