ڕوانگەی سوريی هۆشداریدەدات‌و مه‌ترسیه‌كى گه‌وره‌ به‌هۆى نێرده‌ى ئه‌مریكاوه‌ ئاشكراده‌كات

جیهان

24/07/2025‌ 4866 جار خوێندراوه‌ته‌وه

شارپرێس:

ڕوانگەی سوريی بۆ مافەکانی مرۆڤ ڕەخنەی توند ئاراستەی لێدوانەکانی توماس باراک نێردەی تایبەتیی سەرۆکی ئەمریکا بۆ سوریا دەکات کە ئەندامانی وەزارەتی بەرگریی سوریای لەپێشێلکارییە خوێناوییەکانی سوەیدا بێبەریکردوە، ئاماژەی بەوەکردوە، ئەنجامدەرانی تاوانەکان لەوانەیە داعش بوبن بەپۆشاکی هێزە حکومییەکانەوە.


ڕوانگە لێدوانەکانی باراکی بەبێلایەن‌و بابەتییانە نازانێت‌و بەلادانێکی مەترسیدار لەڕۆڵی نێردەی نێودەوڵەتیی دادەنێت کە پێویستە نێودەنگیر بێت لەنێوان سورییەکان لەپێناو بەدیهێنانی ئاشتیی‌و سەقامگیریی، هەروەک ڕوانگە دەڵێت، ئەم لێدوانانە ڕێگە بۆ کۆمەڵکوژیی نوێدەکاتەوەو هەوڵێکە بۆ داپۆشینی تاوانبارە ڕاستەقینەکان.

ڕوانگەی سوريی بۆ مافەکانی مرۆڤ جەخت لەبونی بەڵگەی متمانەپێکراو دەکاتەوە، لەوانە گرتە ڤیدیۆییەکان‌و شایەتحاڵی باوەڕپێکراو لەمەیدانەوە کە جەخت لەبونی پێشێلکاریی قێزەون دەکەنەوە وەک لەسێدارەدانی مەدەنییەکان‌و فڕێدانی گەنجان لەنهۆمی بەرزەوە، تاوەکو کوشتنی هاوڵاتییەکی ئەمریکی بەڕەچەڵەک سوری بەهۆکاری تائیفی، کاتێک ئەندامانی وەزارەتی بەرگریی سوریا چونەتە ناوشاری سوەیدا.

ڕوانگە داوا لەتوماس باراک دەکات کۆتایی بەڕۆڵی "پارێزەری بەرگریی" بهێنێت بۆ دەسەڵاتێکی کاتیی سوریاو بگەڕێتەوە سەر ئەرکی سەرەکیی خۆی وەک نێردەی نێودەوڵەتی، بۆ کۆکردنەوەی سورییەکان نەک جیاکردنەوەیان، هەروەک لەڕێگەی لێدوانەکانیەوە بەشداریی لەدروستکردنی جیاکاریی نەکات‌و پاساو بۆ تاوانەکان نەهێنێتەوە، جگەلەوەی داوادەکات لێکۆڵینەوەیەکی نێودەوڵەتیی سەربەخۆ لەکۆمەڵکوژییەکانی کەناراوەکانی سوریاو سوەیدا بکرێت، کە لەلایەن لێژنەی نێودەوڵەتی تایبەتمەند لەتاوانەکانی قڕکردن‌و پاکتاوکردنی ڕەگەزیی‌و تائیفی سەرپەرشتی بکرێت.

لەکۆتاییدا، ڕوانگە هۆشداریدەدات کە سادەکردنەوەی بەرپرسیارێتی تاوانبارە ڕاستەقینەکان‌و پاساودانەوەی بەردەوامی تاوانە تائیفی‌و سیاسییەکان، دەبێتە هۆی زیاتر دابەشبونی خوێناوی لەسوریا.