شارپرێس:
ئەمڕۆ شەممە، محەمەد شیاع سودانی، سەرۆکوەزیرانی عێراق پەیوەندییەکی تەلەفۆنی لە ئیمانوێل ماکرۆن، سەرۆکی فەرەنساوە پێگەیشت.
بەپێی ڕاگەیەندراوی نوسینگەی سودانی، پەیوەندییە دووقۆڵییەکانی نێوان هەردوو وڵات و ڕێگاکانی بەرزکردنەوەی هاوبەشی و هاوکاری و هەروەها پرسە ناوچەیی و نێودەوڵەتییەکان تاوتوێ کران.
سودانی ئاماژەی بە هەوڵەکانی حکومەت کرد بۆ داواکردنی بەستنی کۆنفرانسی ناوچەیی لە بەغدا بۆ تاوتوێکردنی پرسەکانی ناوچەکەو جەختی لەسەر گرنگی سەردانەکەی داهاتووی ماکرۆن بۆ بەغدا کردەوە.
ناوبراو پێزانینی عێراقی بۆ هەڵوێستی فەرەنسا سەبارەت بە پرسی فەلەستین دووپاتکردەوە و جەختی لەوە کردەوە کە ئەو پێشێلکارییانەی لە ناوچەکانی فەڵەستین ئەنجام دەدرێن، پێشینەیەکی مەترسیدارن کە بارودۆخی نێودەوڵەتی زیاتر ئاڵۆزتر دەکات.
سەرۆک وەزیران دووپاتی کردەوە، عێراق گرنگی بە گەشەپێدانی ئابووری دەدات، بە لەبەرچاوگرتنی ڕۆڵی بنیاتنەر لە ناوچەکەدا، هۆشداریشی دا لە مەترسییەکانی شەڕێکی نوێ کە هەڕەشە لە ئاسایش و سەقامگیری ناوچەکە دەکات.
جەختی لە ئامادەیی عێراق کردەوە بۆ کارکردن لەگەڵ فەرەنسا و هاوبەشەکانی دیکە لەوان کۆماری ئیسلامی ئێران و ئەمریکا، بۆ ئەوەی نەخزێنە ناو ڕووبەڕووبوونەوەیەکی نوێ. عێراق هەموو هەنگاوێکی پێویست بۆ گەیشتن بەو ئامانجە دەنێت. لە بەرژەوەندی نەتەوەیی خۆیدا، و خزمەت بە ئامانجی ڕێگریکردن لە شەڕ دەکات، لە ڕێگەی دیالۆگەوە بەپێی بنەماکانی یاسای نێودەوڵەتی.
