شارپرێس:
میدیاى نزیك له‌پارتى بڵاویكردوه‌ته‌وه، وەزارەتی دارایی عێراق بڕی 690 ملیار دیناری خستەسەر هەژماری وەزارەتی دارایی هەرێمی کوردستان بۆ موچەی مانگی شەشی فەرمانبەران‌و کەمێکی دیكه‌ش بڕی 300 ملیار دیناری دیکە وەک بڕی دوەم‌و ته‌واوكاریى ڕه‌وانه ده‌كرێت.
به‌گوێره‌ى سه‌رچاوه‌كان، هەموو ڕێکارەکان بۆ ئەوەیە موچەی مانگی شەش خەرجبکرێت، وەزارەتی دارایی حکومەتی هەرێمیش بڕیاره هه‌ركات ته‌واوى پاره‌ى پێویستى بۆ موچه گه‌یشته ده‌ست، لیستی موچە بڵاوبکاتەوە.
بڕیاریشوایه لەم هەفتەیەدا، دوو شاندی هەرێم سەردانی بەغدا بکەن، یەکێكیان بۆ پرسی هەناردەکردنەوەی نەوت‌و ئەو کێشەو گرفتانەی هاتونەتە بەردەمی، هاوکات شاندێکیش بۆ گفتوگۆکردن سەبارەت بەداهاتی ناوخۆ کە ئێستا هەرێمی کوردستان لەگەڵ حکومەتی فیدراڵ گفتوگۆیان لەبارەوە دەکات.
به‌گوێره‌ى بودجەی سێ ساڵەو یاسای دارایی کارگێڕیی، پێویستە سەدا 50ی داهاتی ناوخۆی هەرێم ڕادەستی بەغدا بکرێت، بەڵام وەزارەتی دارایی فیدراڵ‌و حکومەتی عێراق داوادەکەن تەواوی داهاتی ناوخۆی هه‌رێم ڕادەستبکرێت لەگەڵ سەدا 50ی داهاتی فیدراڵی.
لەسەر پرسی داهاتی ناوخۆ، حکومەتی هەرێم‌و حکومەتی فیدراڵ نەگەیشتونەتە ڕێککەوتن، حکومەتی هەرێم ئاماژەی بەوەکردوە، ئامادەییان نییە تەنانەت 120 ملیارەکەش بۆ مانگەکانی داهاتوو ڕادەستی بەغدابکەن، له‌به‌رامبه‌ریشدا بەغدا دەڵێت، "ئێمەش 120 ملیارەکە وەرناگرین، بەڵکو تەواوی داهاتی ناوخۆمان دەوێت".
هەموو پێشبینییەکانیش بۆ ئەوەن، هەردولا ڕوو لەدادگای فیدراڵی بکەن بۆ ئەوەی کێشەکەیان بۆ چارەسەربکات، بەمەش پێشبینیدەکرێت کێشە بۆ موچەی مانگەکانی داهاتوو دروستبێت.
