شارپرێس:

محەممەد حەسسان نوێنەری سکرتێری گشتیی نەتەوەیەکگرتوەکان لەعێراق، لەکۆنفرانسێکدا، نیگەرانی خۆی لەزیادبونی گەندەڵی لەعێراق دەربڕی، ئەو گەندەڵییەشی بەمەترسییەک وەسفکرد کە ڕێگرە لەبەردەم دادپەروەریی‌و پێشکەوتن‌و کاریگەری خراپی لەسەر هەموو بوارەکانی ژیان هەیە.

حەسسان جەختیکردەوە، "گەندەڵی تەنها لایەنە سیاسییەکان ناگرێتەوە، بەڵکو بوارەکانی دارایی، کارگێڕیی، دادوەریی، ئەخلاقیی‌و تەنانەت زانستیشی گرتوەتەوە، به‌ڵام گەندەڵیی سیاسیی، مەترسیدارترینیانە".

نێردەی نەتەوەیەکگرتوەکان چەندین بەرنامەی ئاشكراكرد كه‌ بۆ بەرەنگاربونەوەی گەندەڵیی پەرەیان پێدراوەو کاردەکات بۆ بەهێزکردنی دامەزراوە چاودێرییەکان بۆ دڵنیابون لەپاکی‌و شەفافیەت.

لەکۆتایی قسەکانیدا، حەسسان داوایکرد، "بەشێوەیەکی توندو بێ جیاوازی، مامەڵە لەگەڵ گەندەڵکاراندا بکرێت، داواده‌كه‌ین ستانداردەکانی پاکی‌و سەربەخۆیی دادگاکان‌و شەفافیەت بەهێزبکرێن، داواش لەهەموان ده‌كه‌ین دڵسۆزو بەرپرسیاربن بۆ پاراستنی یەکپارچەیی وڵات، دور لەهەستی تائیفی‌و گروپگەرایی".