شارپرێس:
ڕیاز عودەی، ئەندامی لیژنەی کارەبا و وزەی پەرلەمانی عێراق،  ڕێککەوتنێکی نێوان عێراق و ویلایەتە یەکگرتووەکانی ئەمریکای ئاشکراکرد بۆ دانەوەی پارەی قەرزی فرۆشتنی غازی ئێران لەڕێگای دابینکردنی کەلوپەل و دەرمان و پێداویستیی مرۆیی، لەبری پدانەوەی پارەی نەختینە.

 عودەی ئاماژەی بەوەدا کە ئێران نزیکەی 11 ملیار دۆلار لە عێراق داوا دەکات و بەشێک لەم پارەیە لە بانکە بازرگانییەکانی عێراقدایە، بەڵام بەهۆی سزاکانی ئەمریکاوە ناتوانرێت حەواڵە بکرێت.

 هەروەک وتویەتی: گفتوگۆی بەردەوام لەنێوان شاندەکانی عێراق و ئێراندا هەیە بۆ چارەسەرکردنی ئەم کێشەیە و دووبارە ڕواندنی غازی ئێرانی بۆ وێستگەکانی کارەبا.

لەلایەکی دیکەوە، پارێزگاری بانکی ناوەندی ئێران، عەبدولناسر هیمەتی، قەبارەی شایستە داراییەکانی ئێرانی لە عێراق ئاشکرا کرد کە لە ئەنجامی هەناردەکردنی غاز و کارەبادایە.

ناوبراو جەختی کردۆتەوە کە بانکی ناوەندیی ئێران نزیکەی 7 ملیار دۆلاری لە عێراق هەیە و زیاتر لە 3 ملیار دۆلاری دیکەش شایستەی وەزارەتی نەوتی ئێرانە، بەمەش کۆی گشتیی پارەکە دەگاتە نێوان 10 بۆ 11 ملیار دۆلار.

بەپێی ڕێککەوتنەکان، عێراق پارەی غاز و کارەبا لە هەژمارەکانی بانکی ناوەندیی عێراق و بانکی بازرگانیی دادەنێت.

بڕیار بوو پارەی غاز بە یۆرۆ و کارەبا بە دۆلار بدرێت، بەڵام کشانەوەی ئەمریکا لە ڕێککەوتنی ئەتۆمی لە ساڵی 2018 و سەپاندنەوەی سزاکان، ڕێگری لە عێراق کرد لە دانەوەی ئەم قەرزانە بە دراوی بیانی، کە بووە هۆی کەڵەکەبوونی پارەکە لە سیستەمی بانکی عێراقدا.

ئاکۆ عەبدوڵڵا ئاڵی