شارپرێس:
کۆبونەوەی ئەنجومەنی دەوڵەت کۆتاییهات‌و شارپرێس زانیویه‌تى، له‌كۆبونه‌وه‌كه‌دا هیچ بڕیارو ڕاوێژێك سه‌باره‌ت به‌ناکۆکیی هەردوو حکومەتی هه‌رێم‌و عێراق پێشكه‌شنه‌كرا.
ئه‌گه‌رچى دوێنێ میدیاى نزیك له‌پارتى له‌زارى ئەندامێکی ئەنجومەنه‌كه‌وه بڵاویكردبوه‌وه، "کۆبونەوەکەی ئەمڕۆ چوارشەممە کۆبونەوەی کۆتاییەو تایبه‌تده‌بێت به‌داهاتی نانەوتی هەرێمی کوردستان‌و یەکلادەکرێتەوە"، به‌ڵام شارپرێس زانیویه‌تى، كۆبونه‌وه‌ى ئه‌مڕۆى ئه‌نجومه‌نه‌كه كۆبونه‌وه‌ى ئاسایی‌و هه‌فتانه‌ى خۆى بوه‌و هیچ باسێكى كێشه‌كانى نێوان هه‌ولێرو به‌غدا نه‌كراوه.
به‌گوێره‌ى نوێترین زانیارییەکان، ئەنجومەنی دەوڵەت، بڕیاریداوە سبەینێ پێنجشەممە، کۆبونەوەی کۆتایی خۆی ئەنجامبدات تایبه‌ت به‌پرسى داهاتى نانه‌وتى هه‌رێمى كوردستان.
لەکۆبونەوەی سبەینێدا، ئەنجومەنی دەوڵەت ڕونکردنەوەو بۆچونی یاسایی خۆی لەبارەی ڕاپۆرتەکەی لیژنەی یاسایی ئەنجومەنی وەزیرانی عێراقەوە دەردەکات کە پەیوەستە بەشێوازی ژماردنی داهاتە نانەوتییەکانی هەرێم‌و چارەنوسی موچە.
بەمەش، یەکلاییکردنەوەی چارەنوسی موچەی فەرمانبەرانی هەرێم بۆ سبەینێ دواخراو چاوەکان لەسەر بڕیارە یاساییەکەی ئەنجومەنی دەوڵەت دەمێننەوە.
