شارپرێس:
میدیاکانی تورکیا بڵاویانکردەوە، سەرۆکی میتو سەرۆکی جەهەپە لەپەرلەمانی تورکیا کۆدەبنەوەو پرۆسەی نوێی ئاشتیو چەکدانانی پەکەکە تاووتوێدەکەن.
بەگوێرەی میدیاکانی تورکیا، ئەمڕۆ پێنجشەممە، ئیبراهیم کاڵن سەرۆکی دەزگای هەواڵگریی تورکیا (میت)، سەردانی ئۆزگور ئۆزەل سەرۆکی پارتی گەلی کۆماریی (جەهەپە) دەکات لهپهرلهمانى توركیا.
وهكو باسكراوه، تەوەری سەرەکیی کۆبونەوەی سەرۆکی میتو سەرۆکی جەهەپە؛ تاووتوێکردنی پرۆسەی نوێی ئاشتی لەتورکیاو باکوری کوردستان دهبێت.
پێشتریش بۆ هەمان مەبەست ئیبراهیم کاڵن لەگەڵ هاوسەرۆکانی پارتی یەکسانیو دیموکراسیی گەلان (دەم پارتی)، سەرۆکی پارتی بزوتنەوەی ناسیۆنالیست (مەهەپە)، سەرۆکی فراکسیۆنی پارتی دادو گەشەپێدان (ئاکپارتی)و ژمارەیەک لەسەرۆک فراکسیۆنەکانی پەرلەمانی تورکیا؛ کۆبوەوە.
هاوکات بڕیارە هەر ئەمڕۆ، سەرۆکی جەهەپە لەگەڵ نوعمان کورتوڵموش سەرۆکی پەرلەمانی تورکیاش کۆببێتەوەو گفتوگۆ لەبارەی ئەو کۆمسیۆنە پەرلەمانییە بکەن، کە بۆ ئامادەکردنی زەمینەی یاسایی بۆ پرۆسەی ئاشتی دروستدەکرێت.
پێشتریش ڕاگەیەندرابوو، ئەگەرى هەیە جەهەپە بەشدارنەبێت لەکۆمسیۆنەکەی پەرلەمان، بەڵام لەنوێترین لێدوانیدا، ئۆزەل ڕایگەیاند، ئەو کۆمسیۆنە دەبێت پرسی کوردی تورکیا بەگشتیی لەچوارچێوەی دیموکراسییانەدا چارەسهربکاتو بۆ ئەو مهبهستهش ئامادەن لهبەرزترین ئاستدا بەشدارییان هەبێت.
ڕۆژی 11ى ئهم مانگه، گروپێکی 30 گهریلایى پەکەکە لەڕێوڕەسمێکدا لەئەشکەوتی جاسەنە لەناوچەی سورداشی پارێزگای سلێمانی چەکەکانیان سوتاند وهكو نیشاندانى نیازپاكیهك بۆ پرۆسهى ئاشتیى.
