شارپرێس:
سەرچاوەیەکی دیپلۆماسی سوریا ڕایگەیاند، کۆبونەوەکەی پاریس لەنێوان شاندەکانی سوریاو ئیسرائیل بەناوبژیوانی ئەمریکا، باس لەئەگەری کاراکردنی ڕێککەوتنی جیابونەوەو خۆگرتنی پەرەسەندنی نێوان هەردوو وڵات کراوەو هیچ ڕێککەوتنێکی کۆتایی نەکرا.
تەلەفزیۆنی سوریا دەڵێت، "ئەو سەرچاوەیە ئاماژەی بەوەکردوە، لەداهاتودا کۆبونەوەی دیکە لەگەڵ ئیسرائیلدا دەکرێن".
پێشتر سەرچاوەیەکی دیپلۆماسی لەدیمەشق ڕۆژی پێنجشەممە بەئاژانسی فرانس پرێسی وتبوو، دیدارێکی باش لەنێوان ئەسعەد شەیبانی وەزیری دەرەوەی سوریاو ڕۆن دێرمر وەزیری کاروباری ستراتیژی ئیسرائیل ڕویداوە".
لەلایەکی دیکەوە، تۆم باراک، نێردەی تایبەتی ئەمریکا بۆ کاروباری سوریا لەپۆستێکدا لەتۆڕی کۆمەڵایەتی ئێکس نوسیویەتی، لەگەڵ بەرپرسانی سوریاو ئیسرائیل لەپاریس کۆبوەتەوە.
کەناڵی فەرمی سوریا لەزاری ئەو سەرچاوە دیپلۆماسییەوە ڕایگەیاند، "ئەو گفتوگۆیەی کە شاندێکی وەزارەتی دەرەوەو دەزگای هەواڵگری گشتیی لەگەڵ لایەنی ئیسرائیلی کۆکردەوە، لەڕێگەی نێوەندگیری ئەمریکاوە کراوەو تیشکیخستوهتەسەر پێشهاتە ئەمنییەکانی ئەمدواییەو هەوڵدان بۆ کۆنتڕۆڵکردنی پەرەسەندنەکانی باشوری سوریا".
وتیشی:"کۆبونەوەکە هیچ ڕێککەوتنێکی کۆتایی نەبوو، بەڵکو ڕاوێژکاری سەرەتایی بوو کە ئامانجی کەمکردنەوەی گرژییو کردنەوەی کەناڵەکانی پەیوەندیکردن بوو، لەژێر ڕۆشنایی ئەو پەرەسەندنەی لەسەرەتای مانگی کانونی دوەمەوە بەردەوامە".
باس لهوهشكراوه، گفتوگۆکە باس لەئەگەری کاراکردنەوەی ڕێککەوتنی جیابونەوە لەساڵی 1974 دەکات بەگەرەنتی نێودەوڵەتی، هاوکات داوای کشانەوەی دەستبەجێی هێزەکانی ئیسرائیل دەکات لەو خاڵانەی کە بەمدواییە پێشڕەوییان کردوە.
لە 13ی ئهم مانگهدا لەپارێزگای سوەیدا شەڕو پێکدادان سەریهەڵداو تێیدا ئیسرائیل بەهێرشی ئاسمانی بۆسەر ئامانجەکانی باشوری سوریاو دیمەشق دەستوەردانیکرد، ئیسرائیل دوپاتیدەکاتەوە، ڕێگە بەبونی سەربازیی لەباشوری سوریا نادات.
