شارپرێس:
سورییەک لەكه‌ناراوه‌كانى یۆنان، بەدانەکانی، گوێی گەشتیارێکی ئیسرائیلی قرتاند کە بەمەبەستی گەشت ڕوى له‌و ناوچه‌یه كردبوو.
میدیاکانی ئیسرائیل بڵاویانکردەوە، لەلێواری ئاوەکانی بۆلیڤار نزیک لەئەسینای پایتەختی یۆنان تاوانکارییەک ئەنجامدرا، کاتێک کەسێكى به‌ڕه‌چه‌ڵه‌ك سوریى کە لەئەسینا پەنابەرە، لە(ستاف بن شوشان)و ژن‌و پیاوێکی ئیسرائیلی نزیکبوەتەوە، وێنەیانی بەمۆبایل گرتوەو دروشمی فەڵەستین ئازادبکەنى به‌رزكردوه‌ته‌وه، دواتر هێرشیکردوەتەسەر گەشتیارە ئیسرائیلییەکان.
گەشتیارە ئیسرائیلییەکان باسیان له‌وه‌كردوه، هێرشکارەکە سەرەتا خۆڵی بەچاوی گەشتیارەکاندا کردوە، بۆیە هەوڵیانداوە دوریبخەنەوە بەرلەوەی پیاوانی ئاسایش بگەنە شوێنەکە.
دوای کاتژمێرێک لەدورخستنەوەی، جارێکی دیکە پەنابەرە سورییەکە دەگەڕێتەوە شوێنە گەشتیارییەکەو هەوڵیداوە هێرشبکاتەسەر هاوسەری شوشان، کاتێک مێردەکەی هەوڵیداوە بەرگریی لێبکات، پەنابەرە سورییەکە بەدان گوێی شوشانی قرتاندوە.
ڕۆژنامەی یەدیعوت ئەحره‌نوتى ئیسرائیلى ده‌ڵێت، "دوای ئەو ڕوداوە، شوشان گواستراوەتەوە نەخۆشخانە بۆ چارەسەركردن، هێرشکارەکەش لەلایەن پۆلیسی یۆنانەوە دەستگیرکراوه، بەڵام پێشتر سورییەکە سکاڵای لەسەر گەشتیارە ئیسرائیلییەکە تۆمارکردوە بەتۆمەتی ئەوەی لێدوانی ڕەگەزپەرستانەیداوە".
