شارپرێس:
هەریەکە لەئەمریکا و کەنەدا و 12 وڵاتی ئەوروپا، دەزگای هەواڵگری ئێران بەئەنجامدانی تاوانی کوشتنی نەیارانی لەسەر خاکی وڵاتەکانیان تۆمەتبار دەکەن، تارانیش سەرجەم ئەو تۆمەتانە ڕەتدەکاتەوە.

ئەو وڵاتانەی لەدژی ئێران یەکیانگرتوە، بریتین لە ئەمریکا، بەریتانیا، ئەلبانیا، نەمسا، بەلجیکا، کەنەدا، چیک، دانیمارک، فنلەندا، فەرەنسا، ئەڵمانیا، هۆڵەندا، ئیسپانیا و سوید، لەڕاگەیەنراوێکی هاوبەشیشدا باس لەوەدەکەن کە هەڕەشەکانی ئێران لەسەر خاکی وڵاتەکانیان زیادیکردوە.

لەڕاگەیەنراوی هاوبەشی ئەو وڵاتانە ئاماژە بەوەکراوە،" ئێمە یەکمانگرتوە لەپێناو ڕوبەڕوبونەوەی هەوڵەکانی هەواڵگیری ئێران بۆ تاوانی کوشتن و ڕفاندنی خەڵک لە ئەوروپا و ئەمریکای باکور، کە ئەوەش پێشێلکردنی ئاشکرای سەروەری وڵاتەکانمانە و بەهیچ جۆرێک قبوڵکراو نییە ".

ئەوەشخراوەتەڕوو، دەزگا هەواڵگیرییەکانی ئێران بەردەوام ڕۆژنامەنوسان، لایەنەکانی ئۆپۆزیسیۆن، هاوڵاتییانی جولەکە و بەرپرسانی ئێستا و ڕابردوی ئەوروپا و ئەمریکا دەکاتە ئامانج.

هاوکات، ئیسماعیل بەقائی، وتەبێژی وەزارەتی دەرەوەی ئێران لەڕاگەیەنراوێکدا وەڵامی ئەو تۆمەتانەی داوەتەوەو ڕایگەیاندوە، بەردەوامی ئەو تۆمەتانەی ئەمریکا و ئەوروپا لەدژی تاران، هەوڵێکی ئاشکرایە بۆ پەردەپۆشکردنی تاوانەکانی کۆمەڵکوژی کە بەرامبەر خەڵکی فەلەستین ئەنجامدەدرێت.

وتیشی، ئەو وڵاتانەی تیرۆریستان و چەکدارانی ئۆپۆزیسیۆن داڵدە دەدەن، دەبێت هەموو بەرپرسیارێتییەکی یاسایی پاڵپشتیکردنی تیرۆر و تێکدانی سەقامگیری نێودەوڵەتی لەئەستۆ بگرن.

محەمەد سەردار