شارپرێس:
عەبدوڵا ئۆجەلان رابەری زیندانیکراوی پەکەکە پەیامێکی لەبارەی دۆخی ئێستا تورکیا و پڕۆسەی ئاشتی بڵاوکردەوە و دەڵێت، ئەو کێشەیەی ئێستا وەکو شێرپەنجە وایە و پێویستی بە نەشتەرگەرییە.

دوێنێ پێنجشەممە، هەریەک لەپەروین بوڵدان پەرلەمانتاری دەم پارتی و بریکاری سەرۆکی پەرلەمانی تورکیا، میدحەت سانجار، پەرلەمانتاری دەم پارتی و پارێزەر فایق ئۆزگور ئەرۆڵ سەردانی ئیمراڵییان کرد و لەگەڵ عەبدوڵا ئۆجەلان کۆبونەوە، ئەمڕۆش راگەیەنراوێکیان  لەبارەی کۆبونەوەکە بڵاوکردەوە.

بەپێی ڕاگەیەنراوی شاندەکە،  ئۆجەلان وتویەتی: "کۆمەڵگەی دیموکراتیک، ئاشتی و یەکگرتن، سێ چەمکی سەرەکیی پرۆسەی ئاشتین ."

شاندەکە باسی لەوەکردوە، کۆبونەوەکەی ئیمراڵی ماوەی سێ کاتژمێری خایاندوە و ئۆجەلان تەندروستی و ورەی زۆر بەرز بوو.

ئەوەشخراوەتەڕوو، لە کۆبونەوەکەدا ئۆجەلان، هەڵسەنگاندنێکی گشتگیری بۆ ئەو قۆناخانە کرد کە پرۆسەی ئاشتی و کۆمەڵگەی دیموکراتیک پێیدا تێپەڕیوە و ئەو خاڵەی پێیگەیشتوە .

ئۆجەلان ڕاشیگەیاندوە،" ئامانجمان ئەوە بوو کە هەموو توانای خۆمان بەکاربهێنین بۆ کۆتاییهێنان بە پرۆسەیەکی پڕ لە ئازار".