شارپرێس:
مامۆستایه‌كى زانکۆ ئاشكرایده‌كات، "پەیوەندییەکانی هەرێم (چ وەك حکومەت یان حزب) لەگەڵ ئەمریکا لەوپەڕی خراپیدایە، کە بەدرێژایی (34) ساڵی ڕابردوو دۆخی خراپی لەو جۆرەی بەخۆیەوە نەدیوە"، ده‌شڵێت:"هەرێم هاوشێوەی عێراق، ئێستا دۆخی ئەمنیی، لەزۆنی پرتەقاڵیدایە".
د. نیکۆلا ئەشرەف شاڵی پڕۆفیسۆری یاریدەدەرو مامۆستای زانکۆ ئاماژه به‌وه‌ده‌كات، "ئەمریکا هێزەکانی لەهەرێم جێگیر ناکات‌و پەیوەندییەکانیشی لەگەڵ هەرێم لەوپەڕی خراپیدایە".
به‌وته‌ى د. نیكۆلا، "ئەمریکا ئەو هێزانەی خۆی کە لەڕۆژانی ڕابردوو بەهۆکاری ئەمنیی‌و بەپاڵنەری ستراتیژیی لەبنکەکانی (عەین ئەسەدو ڤیکتۆریا) جێگۆڕکێی پێکردون، بەهیچ جۆرێك ئاراستەی بنکەی (هەریر)ی نەکردون بەمەبەستی مانەوەیان‌و کارێکی لەوجۆرەش ناکات‌و نەشیکردوە".
به‌وته‌ى د. نیكۆلا ڕاستەوخۆ ئه‌مریكا هێزه‌كانى له‌عێراقه‌وه بردوه‌تە بنکەکانی:
تەنەف: دەکەوێتە سێ کوچکەی سنوری نێوان سوریاو عێراق‌و ئوردن.
تاوەری22: ئه‌م بنكه‌یه دەکەوێتە ئوردنه‌وه.
T22، عەدید: ئه‌م بنكه‌یه‌ش دەکەوێتە قەتەر.
سه‌باره‌ت به‌پەیوەندییەکانی ئەمریکاو هەرێمی کوردستان، ئاشكرایده‌كات، "ئه‌و په‌یوه‌ندییه لەوپەڕی خراپیدایە، بەجۆرێك جگە لەئۆفیسی سەرەکی هەماهەنگی هێزەکانی هاوپەیمانان بۆ ڕوبەڕوبونەوەی داعش، سەرجەم لقەکانی تری بۆ هەماهەنگی ڕاگرتون".
ئه‌وه‌شى نوسیوه، "پەیوەندییەکانی هەرێم (چ وەك حکومەت یان حزب) لەگەڵ ئەمریکا لەوپەڕی خراپیدایە، کە بەدرێژایی (34) ساڵی ڕابردوو دۆخی خراپی لەو جۆرەی بەخۆیەوە نەدیوەو هەرێم هاوشێوەی عێراق لەئێستادا دۆخی ئەمنی لەزۆنی پرتەقاڵیدایە".
بۆچونى خۆیشى خستوه‌ته‌ڕوو سه‌باره‌ت به‌خراپى ئه‌و په‌یوه‌ندییه، د.نیكۆلا ڕایگه‌یاندوه، "باشوری کوردستان، بەهەڵەی ستراتیژیی سەرکردە سیاسییەکانی (بێ جیاوازی) گەورەترین دەرفەت‌و قۆناغی زێڕینی خۆی لەدەستدا لەسەروو هەمویانەوە ئەگەری گەڕانەوەی پێشمەرگە بۆ کەرکوك (لانیکەم لەم قۆناغەدا کە گفتوگۆکان بۆ ئەو مەبەستە لەلایەن ئەمریکاوە ڕاگیران)".
له‌كۆتاییشدا ئاماژه‌ى به‌وه‌كردوه، "ئێمە زۆر هاوارمان کرد حەکیمانە مامەڵە بکەن‌و جەمسەرگیریی مەکەن، تەنانەت ئەمجارە شەفاعەت‌و پەیوەندییەکانی (مەزڵوم عەبدی)و نێوەندگیرییەکانیشی لەلای ئەمریکییەکان فریامان ناکەوێت، ئەمانەو چەندین بابەت‌و پێشهاتی تر، تەنها لەبەر هەستیاریی بابەتەکەو پەیوەندیداریی بەئاسایشی نەتەوەییمان نایانخەمەڕوو".
