شارپرێس:
لەسەیرانگایەکی قەزای خەلیفان شەڕ و دەمەقاڵێ لەنێوان خاوەن سەیرانگایەک و ژمارەیەک گەشتیار دروستبوە و بەهۆیەوە 14 کەس برینداربون.

کاروان شێرزاد، بەڕێوەبەری کارگێڕی نەخۆشخانەی خەلیفان بۆ شارپرێس رايگەیاند، ئەمڕۆ هەینی 14 کەس بە برینداری گەیەنراونەتە بەشی فریاکەوتنی نەخۆشخانەی خەلیفان، کە لە ئەنجامی شەڕێکی دەستەو یەخە برینداربونە.

ئەوەشیخستەڕوو،" لە نێو بریندارەکان تەمەنی جیاواز هەیەو برینی زۆربەیان سوکە، شەڕکەرەکانیش بە بەرد و دارو ئاسن لەیەکتریان داوە ".

بەگوێرەی زانیارییەکان، شەڕەکە لە دۆڵی ئاڵانە ڕویداوە کە شوێنێکی گەشتیارییە، سەرەتایی شەڕەکە لە نێوان خاوەن کەپری گەشتیاری و گەشتیاردا ڕویداوە، کە دەوترێت لەسەر نرخی کەپرە گەشتیارەکان دەمەقاڵی دروستبوە، دواتر بە ئاسن و دار و دەست لەیەکتریان داوە، دوای ڕوداوەکەش هێزە ئەمنییەکانی چونەتە شوێنەکە بۆ ئاساییکردنەوەی دۆخەکە.

محەمەد سەردار