شارپرێس:

بەرێوەبەری راگەیاندنی ھاتوچۆی سلێمانی ڕاگەیەنراوێکی لەبارەی ڕوداوی کەوتنەخوارەوەی هێلیکۆپتەرەکەی سلێمانی بڵاوکردەوە.

بەختیار محەمەد، بەرێوەبەری راگەیاندنی ھاتوچۆی سلێمانی لەڕاگەیەنراوێکدا دەڵێت،" زیاتر لە ١٢ ساڵە تیمی فرۆکەوانی - ھەلیکۆبتەر و جایرۆکۆبتەر-  لەلایەن وەزارەتی ناوخۆی حکومەتی ھەرێمی کوردستان و بۆسەرجەم بەڕێوبەرایەتییەکانی ھاتوچۆ لەھەرێمدا دامەزرێنرا و تێچوی کڕێنی فرۆکە و کەرەستە و دابینکردنی باشترین راھێنەری بیانی بۆ پۆلێک لاوی خوێن گەرمی ئەم نیشتیمانە، کە زۆرینەیان ئەفسەری ھاتوچۆ بون و بونە سەرمەشق و پێشکەوتوترین و بەتواناترین فڕۆکەوانی سەر بە وەزارەتی ناوخۆ ".

بەختیار محەمەد باسی لەوەشکرد،" بەندە ھەر لەسەرەتای ئەم شاکارە ناوازەیە ئاگادار و بەشداربوم لە روماڵی کارە خزمەتگوزارییەکانی ئەم تیمانە، وەک ئەفسەرێکی میدیاکاری ھاتوچۆ، بەدرێژایی ساڵانی رابردوو ئەم تیمە فڕۆکەوانیانە لەسەرانسەری ھەرێمی کوردستاندا خزمەتیان کردوە، ھەر لەکاتی کەشوھەوا ناھەموارەکان و روداوە سروشتی و ئاگر گەوتنەوەکان و روداوەکانی ھاتوچۆ لە ناوچە شاخاوییەکان و بەشدارێکی بەئەمەک و کارا بون لە رزگارکردنی گیانی ھاونشتیمانیان و تەنانەت شەرەفی ئەوەیان پێ بەخشرا لە کاتی گواستنەوەی پێشمەرگە قارەمانە بریندارەکانی جەنگی تیرۆرستانی داعش، جگە لەکاری رۆژانەیان لە چاودێری رەوشی ھاتوچۆ لە سەرشەقامەکانی کوردستان وەک ھەڵۆێکی بەرزە فڕ و ئازاد لە ئاسمانی ئەم نیشتیمانە، وەک سەربازێکی ون".

ئەوەشیخستەڕوو،" ئەمڕۆ و لە میانەی پرۆسەێکی یاسایی و مرۆڤانە و لە ھەوڵی گواستنەوەی تەرمی قوربانێکی روداێکی ھەڵدێران لە دامێنی چیای ئەزمەر ژیانی خۆیان کردە مەترسی لەپێناو گەیاندنی تەرمی پیرۆزی ھاونشتیمانیەک و ھەلیکۆبتەرەکەیان کەوتە خوارەوە و بە سەخستی فرۆکەوان و تیمی یاوەری برینداربون ".